Aimee護B慌失失 出院上錯車

陳茵媺本月4日順產誕下重6磅11安士的囝囝Aiden，經過四日三夜休息後，昨日出院，為了讓母子「靜靜地」離開，陳豪決定以一招「調虎離山」計，先着保安邀請在醫院守候的記者到醫院新翼大堂做訪問，然後再安排Aimee與兒子在醫院另一門口離開，不過傳媒估到陳豪有此一着，於另一門口守候，結果成功拍得Aimee母子離開！

BB包到冚避閃燈

Aimee步出醫院前，先由女友人抱着Aiden離開，但怎料卻發現門口有記者，與原先「零記者」的計劃不同，遂返回醫院，未幾，再由醫院工作人員陪伴下，緊緊抱着包到冚的Aiden上車。五分鐘後，Aimee在陳豪媽媽陪同下步出醫院，披上黑白格仔斗篷遮肚、戴黑超的她，精神相當之好，身形沒太大變化，健步如飛，雖沒停低做訪問但全程保持笑容，未知是否心急陪BB，Aimee竟一度上錯車，記者立即提醒，她尷尬地落車再步上自己的座駕，笑笑口跟記者道謝。

「豪仔」由女友人抱着出院。	陳豪見事敗，笑言「無話可說」，由兄長接回家。	陳豪出招，邀記者在醫院大堂受訪。

未能成功「調虎離山」，陳豪笑言「無話可說」，並謂：「因為Aimee啱啱生完身體比較虛弱，BB又脆弱，所以我想佢哋喺冇騷擾嘅情況下慢慢離開。（係咪唔想兩母子咁快見傳媒？）我遲啲都會掟全家福上網，始終Aimee啱啱生完，要等佢完全康復，以最好嘅狀態同大家見面，再加上依家BB好脆弱，唔想啲閃光燈閃到BB。」Aimee由佗B到生完，身形都沒太大變化，陳豪亦大讚Aimee是靚媽咪：「佢由佗住BB到依家生咗，都係非常好嘅狀態！」

會搞baby shower

陳豪之前身體不適，要戴口罩才敢抱BB，如今已好了一點，問陳豪可有狂錫BB？陳豪甜笑：「OK嘅。（feel到做老竇未？）比想像中更開心，見BB咁靚，有好奇妙嘅感覺。（Aimee心情點？）好好，好開心，我哋都學緊點做父母，（識餵奶、換片未？）OK。（有冇請陪月？）安排咗。（會唔會唔畀太太出街？）盡量唔好，坐月要照顧BB，又要調理身體，唔好走嚟走去。」陳豪揚言待他們一家三口安頓好之後，會搞baby shower，至於滿月酒則要視情況而定。完成訪問後，陳豪便飛快地上車離開，趕回家陪伴太太及兒子。

文：影視組