黃芷晴唔靠父蔭 儲錢創業
黃日華與寶貝女黃芷晴同屬「飾」魔一族，經常會父女檔DIY小飾品，芷晴更爆華哥私底下的特殊癖好一面，經常愛戴女裝珍珠飾品登台。她亦拒收「父」資產，正積極儲錢創業，希望開店一圓老闆夢。
修讀設計出身的黃芷晴在讀書時與三五知己經常會互相自製小飾物，之後更索性設立自家品牌，當作一門小手藝，她說：「嗰時同班朋友功課都唔想做，反而想design，大家互相送小禮物，之後同朋友開咗個品牌叫『oh my deer』，因為我好鍾意鹿仔。」
芷晴亦會經常DIY鹿仔小禮物送給男朋友，她說：「我會整皮製嘢畀佢，可能佢唔鍾意鹿，但我會逼佢鍾意。不過我試過話想要隻羊毛氈公仔，男朋友之後真係親手拮咗隻鹿仔畀我，好感動。」
自言是「宅女」一名的芷晴常在家中自製飾物，而一向Man爆的黃日華原來亦對小手工有興趣，兩父女經常會一同四出搵材料，華哥更會出手幫愛女釘皮帶等小手工。問到兩父女的潮流品味是否一致？芷晴哈哈大笑說：「taste唔同o架，佢鍾意運動款，不過我有時整咗個好女裝嘅扣針，圍晒珍珠好女仔o架，點知阿爸竟然想要。我同阿媽都發覺佢好鍾意啲女裝嘢，好變態o架 ，佢會登台嗰時戴。」
夢想咖啡店
芷晴透露日前有上海生意人主動找她洽談生意上的合作大計，而她的夢想是與朋友合資一間咖啡店，並寄賣一些小手作，但她直言正努力搵錢：「未儲夠錢，唔想靠阿爸畀，想自己創業畀屋企人睇。」
文：音樂組