伍樂城拒開金口 阿Sa阿嬌Sing援
星級音樂監製伍樂城入行將近十五年，鐵定明年舉行處男作品演唱會。雖然他拒開金口，但邀得天后陳慧琳、Twins等合作無間的歌手獻唱，大玩香港人的集體回憶，唱盡無數經典金曲。
伍樂城（Ronald）入行快將踏入第十五個年頭，多年來曾與謝霆鋒、張學友、容祖兒、楊千嬅等天王天后合作，創作不少經典金曲。他於明年三月廿九至卅日假紅館舉行一連兩場的「伍樂城幻想國度作品演唱會56X Live 2014」，暫邀得陳慧琳（Kelly）、Twins、衞蘭、杜汶澤等上台獻唱，屆時必定星光熠熠。
慶幸十年前冇搞
Ronald表示早在十年前，已被邀舉行作品展，慶幸當年未能成事。他說：「依家做點都好過十年前做，呢十年我幫過好多歌手做紅館騷，從中偷到師。經驗多咗，對音樂領悟又多咗，集合呢啲思維，覺得今次喺時間同心態上都好正確。如果我以前做，可能會好自我，唔會兼顧觀眾口味。」
雖然距離演唱會還有一段時間，但Ronald已滿腦主意，誓要為觀眾製造驚喜及透過金曲玩集體回憶。問屆時會大開金口獻聲？他笑言：「自己唔唱得，呢個唔係我頭十大重要嘅事，我都係集中音樂編排、彈琴上。」
提到合作無間的Kelly，Ronald大讚對方風格百變：「Kelly錄音好有效率，又相當尊重監製。有時要求佢唱唔同風格，佢兩、三take就搞掂，唱咩類型嘅歌都得，唔係個個做到。」他對另一天后千嬅亦有讚冇彈：「佢個人好直接，同埋佢唱歌有種講故事嘅魔力，佢會幫隻歌加咗好多bonus。」
髮型：Ray
化妝：Flan Wong
文：音樂組