陳豪笑不停 六度讚靚仔

昨晨誕下「豪仔」的Aimee即急不及待在微博報喜，而初為人父的陳豪心情大靚，昨晚出席公開活動時笑言已收到本年度最大的聖誕禮物，他宣布：「相信大家都知道，我嘅baby終於喺尋日arrive咗，BB係尋日（即前日）下午順產，重6磅11安士，健康良好。其實尋日喺屋企已經有先兆，經醫生建議後入院，6個鐘後BB就出世。」

昨日見陳豪身體抱恙不停咳，但不忘盛讚「慈姑椗」好靚仔，講足六次「靚仔」來形容囝囝，他說：「真係好靚仔，一生出嚟就好靚仔，唔係話似我，可能我係爹哋，但BB真係靚，（深得你遺傳？）我唔靚仔，似媽咪！靚到咁可愛，上天賜嘅最好禮物，我父母見到個孫都讚可愛。（外父外母呢？）未返香港。我到依家都唔相信件事變咗做事實，因為Aimee佗BB佗咗好耐。（你咳到咁有冇抱BB？）有，但戴住口罩，我仲陪入產房，但冇拍片，喺旁邊打氣同剪臍帶，冇感動到喊，但覺得成件事very good，太玄妙！生BB唔易，Aimee好堅強，見佢辛苦，我好緊張，但乜都幫唔到，只能靠佢努力。」

陳豪深深感受到生ＢＢ不易，並大讚陳茵媺堅強。

初為人父第一日，陳豪即出席活動撲奶粉錢。

換片避噴泉

問到陳豪有否幫BB沖涼時，他說：「冇，但試過換片，so far so good，叫做避到個『噴泉』，手忙腳亂得嚟算幾好。（再追多幾個？）唔住啦，大家都抖吓先！」他又透露太太會餵人奶，又謂已與Aimee共同為BB起名：「BB英文名叫Aiden，係我同Aimee改嘅。（有A同I代表Aimee？）有少少呢個意思，但仲有另一層意思，不過唔會透露。中文名仲未改，會問老人家意見，再由我同Aimee一齊改。（點獎勵？）點都好，做媽媽真係好辛苦。」據知，Aiden解作Little fire（溫暖小火）。

陳豪胞兄與母親到醫院，陳母手執一袋嬰兒用品。

放大圖片

留院陪太太

談到前日因病失場，陳豪說：「我同Aimee向來低調，想件事靜靜進行，冇透露過畀任何人知，（連無綫高層樂易玲都唔知？）當時唔知囉，我嗰日真係病！我依家盡量抽時間陪BB同Aimee。」對於有指他約滿無綫後，將收20萬一集拍攝戚其義新劇，陳豪以「工作遲啲至講、約滿先講」拒回應。而在活動後，他與兄長及母親前往山頂嘉諾撒醫院探望妻兒，陳母下車時手拎一袋嬰兒用品，她笑言已見過孫仔。而問到狂咳的陳豪怕不怕傳染BB？他說：「啋啋啋！唔會傳染！」經理人則表示陳豪昨晚留在醫院陪太太。

文：影視組　

攝：追蹤組