阮兆祥減10磅舞慶辣妹
藝人阮兆祥昨日為12月14至15日共三場假伊館舉行的「阮兆祥2013 1祥朋友演唱會」做綵排，祥仔大賣關子話每場都會有Superstar現身，又指會與神秘嘉賓合唱張國榮及梅艷芳的經典《芳華絕代》，更大爆為了準備與性感女Dancers大跳辣舞而勁減10多磅，至於到時可會爆衫？他笑說：「如果男仔都想睇就露！我都想fit啲，其實個個都有肌肉o架啦，係睇硬啲定淋啫！」
祥仔又指為票房成績理想而高興，而且得悉不少影帝、影后級的好友都會撐場，他又指出：「好希望大家一齊嚟見證我嘅第一次，到時好多朋友會嚟睇，隨時坐你附近嘅都係星！」
壓力大狂扎醒
至於大搞「處男個唱」可有壓力？祥仔就大呻：「呢排真係瞓得好少，成日扎醒，有少少緊張。」祥仔又同時感激黃柏高（Paco）向他送上新歌，他笑說：「Paco係樂壇金手指，一點石就成金，仲包埋製作費添！」
提到其主演的電視劇《My盛Lady》正在熱播，祥仔都希望劇集能贏盡口碑，加上他即將競逐無綫的男配角獎，祥仔呼籲大家要多多支持。
文：音樂組