張智霖6續有獎 魔童懶得理

憑劇集《衝上雲霄Ⅱ》「Cool魔」一角爆紅的張智霖前晚在《TVB馬來西亞星光薈萃頒獎典禮2013》中大熱勇奪「最喜愛TVB男主角」，女主角獎則由鍾嘉欣憑《巨輪》贏得，首度封后的她激動得變「喊包BB」。

相信選舉公平

前晚完騷後大部分藝員往餐廳慶功，包括Chilam、嘉欣、曾志偉、馬國明、岑麗香、胡杏兒、羅仲謙及蕭正楠等，吸引半百fans在門外守候，場面墟冚！眾星離開時要保安開路，當中以視帝Chilam最受歡迎，獲大批fans索簽名及影相。Chilam透露太太袁詠儀（靚靚）已即時致電恭喜：「阿靚好開心，即刻打畀我，囝囝就差唔多瞓，冇講啲咩。（有信心再贏無綫視帝？）一向對得獎係抱平常心，兩個頒獎禮冇咩關係，相信選舉公平。（有咩心水？）視帝個個都好，女仔就睇好鍾嘉欣。」而他昨返港即轉機往長沙工作，他在近兩周內接連於內地、香港、新加坡及吉隆坡狂掃六獎，非常威水！

胡杏兒跟在餐廳外等候的粉絲打招呼。	嘉欣捧住獎項凱旋歸，笑到四萬咁口。	王祖藍（右起）、陳展鵬及蕭正楠（左）傍實視后鍾嘉欣返港。

男友短訊恭喜

而昨日下午，嘉欣抵港獲約30名fans接機，她拿着視后獎座跟fans合照，非常親民！聲沙沙的嘉欣對於在台上爆喊，她說：「自然嘅反應，始終係第一次攞視后，好深刻，宣布結果前係平常心，一聽到自己個名，心入面諗『吓！真係我？』，諗番初入行嘅經過，得到海外觀眾認同特別開心。」她笑言若再攞獎希望可忍住唔喊，問到有否壓力？她說：「冇，心情好平靜，有信仰幫助。（幾時慶祝？）未知，希望快啲。」問到緋聞男友伍允龍有否恭喜她？嘉欣甜笑點頭：「有收到佢短訊，仲有好多恭喜短訊。亦有親自恭喜Chilam，希望有機會合作，一定學到好多嘢。」

文：影視組