陳豪執定走佬袋陪產
陳豪昨日出席商場活動，透露太太陳茵媺（Aimee）臨盆在即，夫婦心情緊張又忐忑，更執定「走佬袋」隨時入院，故即使本月16日舉行的萬千星輝頒獎典禮有份角逐視帝，也未知會否出席，笑言一切以BB行先，更謂：「我冇信心，BB就係我個獎同皇帝，（心水？）今年好開心，有鎮宇、Chilam、祥仔、馬國明嘛！」
對於早前失蹤的6個月大BB女尚未尋獲，問到陳豪他日會否金睛火眼望實囝囝，他謂：「需要，啲人話離開視線範圍5秒就會出事，（少去外地工作？）都唔會，（帶埋個仔去？）呢方面我幾欣賞蔡少芬，（Aimee都唔放過你？）我知，所以睇吓點先。」