娜姐M到面腫落水呻慘
周秀娜和陳柏宇（Jason）前晚一同出席舞台劇活動，為一眾劇組人員打氣，見娜姐面部浮腫，她自爆正值「月事」期間：「咁啱係女性特別時期，加上啱啱做完嘢趕過嚟，所以做完嘢都要返去休息吓。」她又指在「非常日子」期間拍戲十分辛苦：「冬天時拍夏天嘢好慘，尤其係落水戲，好難搞，加上呢排天氣轉涼，身體仲弱啲。」要做性感女神果然有苦自己知。
恨演舞台劇
娜姐又指自己近年多拍電影，但亦有意嘗試舞台劇：「有機會都想試吓，不過舞台劇題材好似比電影題材少啲。其實我試過同寶珠姐（陳寶珠）拍舞台劇，不過係做啲好奀嘅角色，我都做過詹Sir（詹瑞文）個show嘅嘉賓o架，做舞台劇執生能力要好啲。」
聖誕冇假放
同場的陳柏宇（Jason）大前晚剛完成處男個唱，他大呻聖誕無假放，問他是否豬籠入水？他慨嘆：「咁多年收入都有增長嘅，但點增都係未買到樓，不過我又諗如果我結咗婚嘅話會想返加拿大住，諗諗吓不如唔好買！」問他是否暗示婚後會離開香港？他婉轉地答：「起碼七年後嘅事啦，睇吓呢幾年搵到幾多先啦。」
文：音樂組