吳千語有heart 玩啟發
出道時被譽為「少女版楊采妮」的吳千語（Karena），出道後工作不斷，除了備受公司力捧，亦深受各大品牌喜愛，才20歲的她已獲得一份與國際化妝品牌合作的合約，這是一眾超模夢寐以求的終極目標之一。愛情方面亦同樣得意，男友林峯對她百般愛錫，絕對是集萬千寵愛在一身。
吳：吳千語 記：記者
記：世界各地超模其中一個事業上嘅終極目標係希望得到一份國際化妝品牌嘅合約，你咁細個已經得到，覺唔覺得自己好幸運？
吳：當然覺得自己幸運，出道年資尚淺就有呢個機會，而且同Estee Lauder嘅團隊合作都好開心，多謝客戶嘅賞識畀咗我呢個機會。其實入行以嚟都覺得自己好彩，尤其係遇上老闆黃百鳴，係佢畀我機會擔正演出我第一部電影《開心魔法》嘅女主角，正式當上演員。當然都要多謝公司、身邊嘅同事以及一直支持我嘅朋友，畀咗我好多幫助同鼓勵，我會繼續努力，珍惜眼前每一個演出機會。
記：嚟緊工作上有咩目標？
吳：想拍多啲電影，多啲唔同嘅嘗試，例如想試吓演愛情片，自己本身鍾意睇戲，希望演出一啲inspiring嘅電影，透過電影傳遞訊息，可以帶畀觀眾反思嘅空間。
婚姻係一生一世
記：愛情方面追求點樣嘅愛情？
吳：細水長流嘅愛情，自己對愛情好認真，每次拍拖都會以結婚為目標，咁結婚之後當然希望會係一生一世，唔想婚姻有咩波折。生活上一啲好小嘅事已經可以令我感動，我享受生活嘅細節。
記：作為林峯女朋友有咩想改善？
吳：自己性格比較急，其實唔只係做女朋友，就算平時日常生活對住其他人，我都想改吓心急嘅性格。所以我細個時媽咪就畀我學畫畫同彈琴，依家已經改善咗，仲想再好啲。
記：有愛情滋潤會令人靚啲？
吳：我覺得心態最緊要，要keep住心情開朗，盡量開心啲，多啲正能量，自己係個比較樂天嘅人，一啲好簡單，好小嘅事已經可以好開心。同埋做運動都可以令人容光煥發。
記：女為悅己者容，對住男朋友會唔會扮靚啲？
吳：我嘅工作就係要令自己靚，目前最重要係工作，自己都會勤力啲去保養，因為工作需要，要keep住狀態好同身體健康；而男朋友只要我健康同肥番啲。
記：滿唔滿意自己身材？
吳：可以再健康啲，做多啲運動，要食多啲營養豐富嘅嘢。我本身瘦底，比較難長肉，平日都食好多嘢，比起其他女仔我算大食，食量接近男仔，所以我鍾意同男仔食飯或者同啲鍾意食嘢嘅人一齊食，唔會人哋停晒手自己仲繼續食，咁樣我會覺得唔好意思。我覺得無需要減肥，肥瘦並唔重要，健康先最重要。
生活要健康開心
記：追求一種點樣嘅生活？
吳：健康同開心嘅生活，香港生活步伐好繁忙而且少機會可以接觸大自然同做運動，我鍾意喺啲空曠地方跑步，鍾意戶外活動，置身大自然，可以好放鬆。飲食方面我都好健康，最近就有飲椰子水排毒同加速新陳代謝；我又鍾意食日本菜，清啲，大部分都係少啲油同少啲調味料，健康啲。希望生活同工作取得平衡，工作上嘅努力可以得到成果，私底下嘅生活亦都好開心，同屋企人、朋友關係好好，可以做自己鍾意做嘅嘢，我鍾意做啲好簡單但又令我好開心嘅嘢。
記：你嘅生活享受係咩？
吳：生活享受對我嚟講就係可以做自己鍾意做嘅嘢，平衡自己嘅生活，如果只係一直工作，就感受唔到生活。我鍾意做運動、旅行、食嘢同埋睇戲，可以好放鬆。我鍾意食嘢，因為平時工作食嘢好求其，放假就想坐低舒舒服服咁食餐飯，好寫意咁食啲美味嘅嘢，我覺得好享受。
入行學會護膚
吳千語皮膚白滑，除了天生麗質，當然也要後天保養，她說：「入行前唔係特別注重護膚，覺得自己年紀仲細，入咗行之後經常都要化妝，會加速肌膚老化，加上有時要喺戶外受日曬，就更加容易老化，所以為肌膚保濕好重要。」
她說自己皮膚屬於乾性，但因為懶，所以愛用晚間修護的護膚品：「瞓住覺都可以護膚，第二朝會feel到好吸收，肌膚飽滿同有光澤。平日我落完妝主要都係用toner、精華液同晚間修護，徹底卸妝保持肌膚清潔都好重要。皮膚係沒有最好，只有更好，依家個狀態OK，要更加好，因為成日都要化妝化好長時間，唔使工作時就好少化妝，等皮膚可以休息吓。」
最愛短褲波鞋
經常被指要行街shopping買名牌的千語，其實並非如外界所說那麼喜歡shopping，她說：「shopping都會，但唔會話好開心，好多時都係為工作要裝身，自己私底下着嚟着去都係嗰幾件衫。我鍾意啲造型係可以跑步同行得好快嘅，要好方便，舒服。當然喺啲重要場合要dress up。夏天我必備嘅服飾係一條短褲，一件tee再加一對波鞋，特別鍾意着波鞋，好多衫都襯到，高踭鞋我都鍾意，不過工作時已經着好多，講到實用性高始終都係平底鞋同波鞋。」
採訪：張嘉敏
攝影：秦健輝
場地：Estee Lauder