劉嘉玲懷舊革新
時裝進化是經過時間與革命的演變，令服裝原有形態有所變動，因而有「New Look」時裝名詞誕生，時至今日再度演變成The New 「New Look」，簡潔線條偏向中世紀服飾形態，帶點cinematic feel，而星級造型師Ricky Kwok（郭慶彬）盛讚劉嘉玲的頸上蝴蝶結是亮點絕配，滲透出懷舊韻味，而荷里活女星Nicole Kidman的黑金配夠古典美！
劉嘉玲
圓領針織貼身衫配襯大傘裙，夠volume，望落去有五、六十年代懷舊韻味，而佢頸上蝴蝶結仲係造型靈魂所在，否則變得好普通，襯得夠絕！
范冰冰
hard sell懷舊感覺，專登梳個中間分界嘅高髻，化個濃妝兼揀件off shoulder款，集齊所有復古懷舊元素，弄巧反拙，變得好娘。如果呢種印花圖案配搭得宜，會好有retro style感覺。
章子怡
打扮好淑女，LBD（Little Black Dress）係經典款，裙好難着出事，但襯咗條腰帶，令腰線分開咗，感覺好騎呢，毫無美感。
時尚總編Anna Wintour
黑色貼身top襯傘裙配搭本來就冇特別，佢最醒係襯咗條chunky頸鏈，做到上下呼應嘅潮味感覺，加埋佢標誌性嘅冬菇頭，望落去好有型格霸氣。
全智賢
第一眼望落去顏色夠搶眼，誇張裙襬嘅設計好有霸氣，雖然佢唔算係大美人，但勝在氣質搭夠，行出嚟都好Charming。
姬絲汀史釗活
佢靚在配件搶眼，一件孖襟褸本來款式斯文又普通，但佢襯對露指手套，clutch同cut out款尖頭高跟鞋，成個造型變潮咗，而且喺雙靚腿嘅演繹下，性感、型格、高貴集一身。
妮歌潔曼
乾淨利落線條加埋佢高大骨架，好普通貨色，都可以做到人着衫嘅絕頂效果，而黑中帶金嘅飾邊設計同配飾呼應，一啲都唔俗氣，加埋佢一頭金髮襯到絕，好有古典美。
Angelababy
着唔出古典貴氣，加埋個妝同髮型，令佢好老積，好似細路扮大人，強裝成熟，似老人精多啲！
Ricky
著名星級造型師郭慶彬（Ricky）曾遠赴米蘭與巴黎時裝周，也曾被邀在中國時尚節目《美麗俏佳人》擔任嘉賓主持，更曾為李冰冰、吳君如與張惠妹等擔任造型師。