莊思敏好飾 等收大鑽石
貪靚的莊思敏（Jacquelin）和何紫綸（Ann）與普天下女生一樣，對鑽石情有獨鍾，不過Jacquelin就教路買鑽石獎勵自己，千萬不能買太大粒，否則會令另一半壓力爆煲。大頭蝦的Ann就試過被海浪沖走鑽石耳環，惟有嘆一句破財擋災！
莊思敏和何紫綸為下星期舉行的《香港珠寶小姐競選》分別擔任大會司儀和儀態導師，日前兩人帶同十位候選珠寶小姐到贊助商公司，感受戴上閃爆鑽飾時的喜悅。兩人異口同聲表示鑽石對女生來說有種不可抗拒的魅力，Ann笑言：「最愛簡單款式就咁一粒鑽石，唔鍾意碎石，不過自己都唔係好捨得買太貴嘅石，大粒嘅等老公送啦！」Jacquelin深感認同：「我買過最貴嘅都係幾萬蚊嘅石，一卡都唔夠。大卡數梗係等人送，自己買咁重手，佢哋會好大壓力，都唔知買咩畀我哋好，哈哈！」
Ann滑水失耳環
Ann又謂試過戴住半卡鑽石耳環滑水，最後發現被海浪沖走一邊耳環，她只能大喊三聲，雖則自我安慰是破財擋災，但其大頭蝦性格，慘被兩位姊姊「排斥」：「佢哋唔肯同我share首飾戴o架，覺得我好易整唔見。不過媽咪喺我18歲做model時留咗隻大卡數戒指畀我，有啲似係嫁妝感覺，我只係喺屋企戴過咋，會留到結婚先戴出嚟。」
前度好少送戒指
Jacquelin亦同意媽媽所送的戒指最具意義：「媽咪喺我好細個時送咗隻戒指仔畀我，雖然依家連尾指都唔啱戴，但我一定會保管好。反而以前啲男朋友少送戒指，可能因為有個承諾責任喺度，多數會送耳環頸鏈。」問到分手後可會將首飾送給「垃圾桶」？她笑言為了環保不會如此浪費：「梗係唔會，最多拆咗啲石換做其他款，唔好嘥嘢呀！」
文：音樂組