林志美聞所未聞做咗女神
歌手林志美聯同方伊琪、裕美、高皓正、王憓、林百成、卓達及鄭倩蘭將於本月21日在旺角麥花臣場館舉行《但願人長久經典金曲演唱會》，演繹已故天后鄧麗君（小鄧）的經典金曲。問到她可認識鄧麗君？志美表示：「當年大家唔同唱片公司，而且佢係前輩級歌手，大家唔同年代，冇機會見到佢，不過佢當年喺香港開演唱會，我有去捧場，佢嘅歌可以話家傳戶曉，就算到依家都好襟聽，完全冇時間規限。」
唔會爭歌唱
既然鄧麗君金曲眾多，今次歌手間可有「爭歌唱」情況？志美笑言：「咁就冇，大家有商有量，唔使抽籤嘅。」而志美稱會唱鄧麗君的《我只在乎你》、《月亮代表我的心》及《再見我的愛人》，亦是她首度在舞台演繹她的歌曲，她謂：「鄧麗君好多歌我都識唱，所以緊張就唔會，但上到台唱佢嘅歌都會戰戰兢兢。」問到何時舉行個人演唱會？志美坦言之前入紙紅館不成功，希望明年能夠舉行，而管弦樂團與歌手都想找她合作，但她仍未決定演出形式。
當年林志美的經典情歌，成為少男們心目中女神，對於被封「女神」，林志美笑言：「我真係唔知，都係歌迷同我講先知，我心目中嘅女神係有光環，比較高層次，視我為偶像就知，但女神就冇諗過。」
文：音樂組