鍾麗緹1,300蚊 掃浮誇朱義盛
現年43歲的鍾麗緹回流香港，前日下午素顏行銅鑼灣，孭住名牌手袋的她，不拘小節地攻平民街邊檔，並以約1300蚊買下數條「朱義盛」頸鏈，開心又滿足地離開。
經歷過兩段婚姻失敗的鍾麗緹，未有影響其樂天性格，原本和3名女兒長住北京的她，近日簽約回流香港發展。前日鍾麗緹獨自出動去銅鑼灣行街，名牌手袋裝身的她，頭戴cap帽，全身包到冚，雖然素顏示人，但依然艷光不減。
唔使講價
當日下午約4時半，鍾麗緹棄名店不入，反而專攻平民街邊檔口揀「朱義盛」飾物，期間見鍾麗緹相當親民，於人來人往的路邊揀唔停，同時更和老闆娘有傾有講，不時露出燦爛笑容。只見鍾麗緹對造型誇張的大頸鏈情有獨鍾，不停拿上手拼來拼去，而且火速揀中幾條頸鏈。雖然只是街邊檔，但收費並不便宜，埋單盛惠約1300元，揀啱心頭好的鍾麗緹，未有和店主討價還價，二話不說興奮地取出名牌銀包付款，孭名牌的她揀平價貨一樣咁開心。
任影唔嬲
及至發現記者拍照，鍾麗緹照樣笑晒口任影唔嬲，她友善地問記者邊間報館，更搞笑地問：「點解你哋認到我嘅？（你咁靚女。）但我冇化妝！」說時又展開招牌燦爛笑容，然後再禮貌地揮手離開。
文、攝：追蹤組