軟硬開騷着雞汁現代褲
葛民輝（阿葛）和林海峰（Jan）組成的「軟硬」將於農曆新年前夕再度玩轉紅館，阿葛承諾會以「朱古力」肌向觀眾拜年，叫大家準備好大利是。Jan則笑言會着現代褲打底，再加雞汁共冶一爐。又說每逢開騷全屋女人都會引來很多狂蜂浪蝶，為幫女兒「斬桃花」，Jan落閘說：「唔好追我個女喇！」
適逢今年是「軟硬」入行25周年，阿葛和Jan昨日頭笠卡通膠假髮舉行記招宣布明年1月23至26日及28至30日，將再度殺入紅館舉行共七場的《麥當勞麥麥嘻麥麥哈軟硬嘻哈OPERA 2014》賀歲騷。兩人今次大搞新意思，以歌劇會歌迷，Jan不忘抽水說：「今次我哋會結合芭蕾舞同本土電視劇精神，會着現代褲打底，再加雞汁共冶一爐。」阿葛則表示會以六個場口重現兩人25年來的經典時刻。
阿葛演胸肌夾利是
開騷時間正值農曆新年前夕，阿葛不惜「賣肉求財」，他說：「我會用肌肉去夾大家嘅利是，見到大利是仲會再谷行啲！」其中1月28日又正好是Jan的46歲牛一，他笑言為免孤零零過生日，所以答應生日開工：「我驚冇人約，咁啱紅館有期，阿葛又得閒，咪打發吓時間。」阿葛即笑言會送上人肉蛋糕祝賀：「咁我將我排朱古力變做蛋糕幫佢慶祝，六舊變一舊易好多！」
「買飛咪追我個女」
有指Jan大女林泳追求者眾多，但他下禁令不准女兒拍拖，他昨否認但語帶雙關說：「冇唔畀，不過想買飛直接搵我同公關好啲，唔好追我個女喇。通常開騷前就好多飛來蜢，想用唔同渠道接觸我哋買飛，其實最近我家傭都多咗人追！」問他大女的追求者只是想追飛，而非追她？Jan笑言：「唔排除呢個可能性，但相信係個別事件。」
文：音樂組