紅姑為朴贊郁 癲得喜

鍾楚紅昨日為韓國護膚品牌的新店開幕擔任剪綵嘉賓，身穿藍色斜膊裙的她由兩名穿着韓國傳統服裝的韓籍男模陪同現身，提到近年韓風強勁，問她有否喜歡的韓星？紅姑坦言甚少觀看韓劇或韓國電影，不太留意韓星，反而有欣賞的韓國導演，她說：「我鍾意拍《原罪犯》嘅導演朴贊郁，佢好有才華。（佢搵你拍戲，你會唔會肯出山？）話唔定，佢嘅劇本好好。（但故事好暴力。）我欣賞佢嘅電影，想拍佢嘅戲，但啲劇本未必啱我，可能要我做變態婆或者畀人斬開幾件。（接唔接受到？）好難講，睇我當時情況，可能我嗰排癲癲哋會想做。」不過，她自言近期想追求平和，因為有感社會上太多戾氣。

同男人鬥撞

雖然紅姑對韓星不大感興趣，但她對韓國男士就讚不絕口：「好靚仔，身形又弗，感覺好健康，係男人嗰種靚。（好man？）係。（鍾意有腹肌？）有好過冇，我都想有。（鍾意韓國男生定港男多啲？）講靚，韓國男仔整體靚啲，但內涵都好重要，唔係淨係睇樣，係整體感覺。」

有指韓國男士大男人，紅姑也認同，並指多年前曾在韓國拍戲有所經驗：「好惡，覺得唔係好睇得起女性，佢哋行路唔睇人，橫衝直撞，冇男士風度要女人避佢，我有少少鬥氣，同佢鬥撞。但我好多年冇去韓國，佢哋應該西化咗少少。」

文：名人組