Juno三級殭屍 票房過千萬
麥浚龍（Juno）執導新片贏得不錯口碑及票房，他大方將成果歸功於整個製作團隊。Juno不諱言獲斟拍續集，但堅持見好就收。他笑言獲院商聯絡，要求將ⅡB級與Ⅲ級版同時上映，令大眾對該片更感興趣。
Juno嘔心瀝血的「處男執導作」《殭屍》殺出一條血路！電影上映11天，於港澳兩地共錄得1,100萬港元票房，平均每天「進帳」100萬，教台前幕後振奮不已。
想拍其他題材
Juno接受電話訪問時笑說﹕「大家一知道有三級版之後，對《殭屍》興趣就更大，有院商主動聯絡我哋，寧願間戲院ⅡB級同Ⅲ級一齊上，真係喜出望外。」他又稱電影海外賣埠成績理想：「起碼都賣咗八成，其實已經有投資者斟拍續集，但我覺得同類題材唔會係我下一部電影嘅選擇，況且我手頭上都有其他題材嘅劇本嘞。」
雖然票房大收，但Juno並未往自己臉上貼金，反而大方稱：「今次嘅成功，應該歸功於整個製作團隊，要感謝嘅名單實在太長嘞。而令我覺得最欣慰嘅，係今次證明香港影壇其實可以容納更多嘅題材同新血。（日日check住票房？）我就係唔想太大壓力，呢排都習慣熄電話休息，當然真係都收到好多朋友嘅電郵同短訊祝賀啦。」
日內赴台宣傳
另外，Juno日內將與戲中兩位男主角錢小豪及陳友，飛抵台灣展開為期三日的宣傳。當地媒體對《殭屍》亦甚表興趣，故Juno接下了不少專訪，繼續力谷宣傳，希望電影周五正式在台灣上畫時「再下一城」。
文：影視組