Celia胸鬥夜蒲女 唔怕師姐復出
「寸嘴Barbie」夏尉喻及郭穎兒（Celia K.）前晚低胸裝出席電影煞科宴，胸殺女主角許亦妮、雨僑及何佩瑜（Jeana）！提到潛水中的陳靜（DaDa）再被拍到夜蒲，好友Jeana即為她講好說話，但對於DaDa身形翻脹，她卻讚不出口！而DaDa師妹Celia K.則不介意師姐復出會搶飯碗。
導演錢國偉新片《喜愛夜蒲3》前晚舉行煞科宴，一眾演員陳柏宇、伍詠薇、許亦妮、雨僑、林德信、何佩瑜、郭穎兒及夏尉喻等出席，當中以谷盡D Cup導彈的夏尉喻及晒三吋事業線的Celia K.最搶鏡。搞笑的陳柏宇甫見雨僑即用對方的名字講有味笑話，但玩互餵芝士腸時，有女友的他變得淆底，只肯跟男歌手應昌佑玩，似怕女友呷醋！其後應昌佑與Celia咬腸仔後亦笑言會被老婆扭耳仔。
對於「曠工」多時的好友陳靜再被拍到夜蒲，Jeana說：「萬聖節係開心日子，唔通唔畀玩咩！（佢情緒好番晒？）康復緊，等佢自己交代。」提到DaDa現時體形脹了一個碼，Jeana猶豫地說：「女仔太瘦唔好，要有肉地。」但問到是否覺得對方身形很漂亮，她即時語塞，只說：「在場人士都好靚。（鼓勵DaDa復出？）佢開心就支持！」至於DaDa師妹Celia表示不清楚對方與公司之間的官司，兩人最近有傾電話，但沒有談及此事。問會否怕DaDa復出搶走其工作？Celia大方地說不介意：「我同佢路線唔同，一齊工作就最開心。」
許亦妮不做第三者
至於前港姐許亦妮的有米緋聞男友Andrew被揭另有女友，提到此事時她不耐煩地說：「好悶呀！如果拍拖會講，但呢次唔係，我仲係單身！（之前話發展中？）冇講過！（對方介意公開？）所有朋友都會驚，咁樣被起底好唔公平。」她直言介意被指是第三者，自認是正經女仔，不開心背上小三稱號。
文：影視組