超盈低胸掩護 新歡速閃

賭王何鴻燊四房長女何超盈與男友Greg分手後，即變城中鑽石級筍盤，24歲的超盈早前公開表示希望找到一個可靠及踏實的男友，雖然早前她曾傳出與舊愛孔樂勤翻撻，但其實超盈最近已與一名年紀相若的「蛋撻頭」蜜運，大前晚陪完母親四太晚膳，前日她即出動孖新歡拍拖。

揀新裝問意見

前日下午約5時，超盈穿上吊帶超低胸的小背心襯leggings，悉心打扮的她一臉風騷，並與梳了「蛋撻頭」的新歡雙雙前往了中環商場甜蜜行街，見「蛋撻頭」打扮斯文、外形與超盈舊愛Greg甚為相似，兩人並肩而行邊行邊傾，超盈不時被「蛋撻頭」氹到冧爆甜笑，二人其後步入了附近的名店揀新裝，只見超盈試完大褸又試襯衣，新歡全程陪伴伊人左右，又不時給予意見。當醒目的超盈發現記者拍照，即時表現緊張，與新歡各自彈開，更在店內的暗角位避鏡頭。

「蛋撻頭」與超盈分道揚鑣後不停篤電話，似向對方聯絡。	「蛋撻頭」為超盈推門，甚有風度。	超盈與新歡肩並肩貼到實孖住行街。

前言不對後語

為保護戀情，超盈不惜先行步出名店引開記者，好讓新歡離開。當她步出門口時，被記者追問對方是否新男朋友？春風滿臉的超盈嬌嗲說：「唔係呀！係男朋友都唔嚟中環啦，佢唔想上鏡咪唔一齊走囉。」至於留於店內的「蛋撻頭」，見記者追着超盈時便鬼祟閃走，甫見記者上前拍照，他一臉驚訝，問及是否和超盈拍拖？「蛋撻頭」緊張地說：「唔係呀！朋友咋，我約咗佢食飯咋。」當再被追問為何一齊食飯卻分開走？他語無倫次說：「我約咗人呀。」其後他更邊行邊按電話，似向超盈通風報信，未幾索性直奔後巷再轉入百貨公司速閃。

記者追着「蛋撻頭」，發現他行後巷速閃。

超盈在店內試衫，不時問新歡意見。

沐浴愛河的超盈心情靚爆，近日更於社交網站上載於家中浴室的自拍照，表示正等待沖泡泡浴，就連衣帽間也公諸同好，留言指要尋找心水靚衫去街街。

文、攝：追蹤組