徐子淇瞞住老爺 乖仔笑騎騎
「千億新抱」徐子淇瞞着老爺李兆基，讓年僅兩歲多的兒子李俊熹學騎馬。她直言上一輩多以「保護式」湊小朋友，但大膽的她坦言不怕寶貝仔跌斷骨，認為男生要經得起跌跌碰碰，才會變得更堅強。
徐子淇昨日以一身馬里奧造型現身慈善隊制接力賽，最後獲得第9名，即尾二衝線。非運動型的她高呼非常辛苦，並自嘲：「我拖累咗成隊，去到一半其實佢哋仲跑到，但我已經要行。（之前有冇練習？）冇呀，大家都係抱住玩吓嘅精神，冇所謂。」
她笑言自己適合玩長途賽，平日行山走兩至三小時亦沒問題。問到是否不夠家中的孩子跑？她笑言：「唔夠啦，好彩佢哋對腳唔長，佢哋三步先等於我一步，我仲追到。」她笑言要待兩歲多的兒子李俊熹長大些，才可一同參與親子賽，否則要抱着他跑會很辛苦。
男仔跌吓先強壯
她透露家中三名子女都是運動型，兩名女兒李晞彤及李晞兒都懂得滑雪及游泳，而三姊弟均懂騎馬。她說：「囝囝好搞笑，坐喺馬上面戥吓戥吓，有用安全帶同戴頭盔。好多人都話好危險，不過我覺得男仔要畀佢跌吓先會tough啲，強壯啲。（老爺李兆基知唔知？）我冇畀佢睇過，佢知兩個女識騎馬，個仔就未知。」
她坦言上一代多以「保護式」湊小朋友，但她認為要讓孩子多作嘗試：「男仔斷吓骨冇所謂。可能我喺外國大，見到啲男仔玩欖球玩到斷骨都冇嘢，都要完咗場比賽先去睇醫生。（唔怕危險？）好多朋友都話我好大膽，但我都會顧小朋友嘅安全嘅。（老公李家誠同你諗法一致？）佢冇所謂，不過我同佢都未斷過骨。」她表示假如遇到少許痛楚或挫折就放棄，人生其他事情都很難面對，故要多鼓勵小朋友勇於嘗試。
文：名人組