JJ出碟開才路 樊少皇(抓)包養
藝人賈曉晨（JJ）昨日舉行微電影暨個人唱片發布會，以一襲白色低胸吊帶長裙示人，「峰」騷4吋事業線，而男友樊少皇、好友錢國偉和陳宛蔚等都有現身撐場，今次JJ首次親自操刀，在兩部微電影中自編自導自演，男友雖然忙於拍攝電視劇，都有抽空在JJ的「處女作」客串，另外亦有請來「警鐘胸」名模Jessica C.擔正做女主角。
小富婆多樓揸手
JJ更一手包辦兩套戲的主題曲詞創作兼監製，誓要向才女路線進發！而男友亦有出手為JJ的新唱片創作快歌《環遊世界進行曲》，樊少皇說：「我哋好鍾意去旅行，之前去旅行一路都諗緊呢類題材嘅歌。」提到有報道指兩人早前去澳洲旅遊，由JJ包男友豪飲豪食，兩人聞後一笑置之，JJ笑說：「如果真係咁就戥佢開心囉，我可以養埋佢（有話你有4層樓？）我唔否認自己喺樓市投資賺咗啲嘅，加埋大陸唔只4層。」兩人之後繼續耍花槍，樊少皇更笑言叫JJ拍更多戲，日後環遊世界靠女友，而JJ說：「你唔好寸我啦。」
對於女友第一次親自執導，身為動作指導的樊少皇透露都有幫女友一把，其中Jessica C.在戲中與男主角的一個親密動作都由他設計，他又為女友拍攝辛苦要捱更抵夜感到心痛。
文：音樂組