陳偉霆錯救胡軍傷手筋
藝人陳偉霆早前為新電影拍海報，片中飾演消防員的他一嘗兒時的夢想，不過在拍攝一場拯救內地男星胡軍的戲份時，疑用錯力扯傷手筋，但見到謝霆鋒的搏命精神，他自言少少傷冇乜事。
近期長駐內地拍劇的陳偉霆（William），早前回港為英皇電影《救火英雄》拍攝海報，導演郭子健親自為他化妝及裝身，穿上全副消防裝的William，笑言小時候的夢想是當消防員，故今次能參演感到很開心，並謂：「我平時好鍾意做運動，今次拍攝係好好嘅體能訓練，拍前導演特登安排所有演員去消防局受訓，學孭氧氣樽同所有知識，因為驚我哋喺片場有危險。（練到張家輝嘅爆肌身材？）練唔到，因為都冇除衫鏡頭，所以唔使刻意去練。」
讚霆鋒忍得
提到胡軍在鐵橋高處墮下一幕，用手扶對方上去的William不慎受傷：「佢好大隻，可能我發錯力，成條筋扯傷咗，仲NG咗好多次，自己少少傷都唔算咩特別，因為見到霆鋒好搏。」對於拍攝時長期戴面罩很侷促，他大讚霆鋒超專業：「我哋拍攝時要孭氧氣樽、戴面罩，要除面罩都幾煩又要除帽、除帶，起碼搞成5至10分鐘，我每一次拍完都好想除，因為好熱，但我見霆鋒坐喺度唔除、好專業，有一、兩次我已經想暈，但我又唔敢除，冇理由要佢等我戴，所以我覺得佢好犀利。佢仲全部動作場面唔用替身自己做，好開心可以學習佢嗰種拚搏精神！」他又指該片去年12月已拍畢，之後花了一年時間做後期製作。
談到女友蔡卓妍（阿Sa）呻William似移民橫店，問到對方有否埋怨？自稱7個月冇返港的他說：「佢（阿Sa）都成日唔喺香港啦，冇乜嘢嘅，佢知我喺橫店好快樂，因為識咗班好朋友，又有得做健身。（怕被香港觀眾遺忘？）所以我會繼續拍電影。」
文、攝：影視組