黎瑞恩復出開騷 仔女Say no
「一人有一個夢想」，當年黎瑞恩為了一圓紅館夢，在臨別樂壇前舉行首個紅館演唱會。相隔十一年，小恩子再次踏上舞台，舉行一連兩場個唱，一眾歌迷可謂等到頸都長，不過她一對寶貝仔女竟然Say no，反對媽媽復出！她亦明言會否再開演唱會是未知之數，可能要等多個十一年，亦可能無了期！
黎瑞恩十一年前舉行完處女紅館個唱後，便退出樂壇，專心相夫教子。下月她將在會展舉行一連兩場個唱，卻遭一對仔女反對！
小恩子的大女今年十歲，細仔八歲，兩人起初完全不知眼前的媽媽曾經是風靡萬千少男的一代玉女，她笑言：「佢哋本身唔知我係歌手，係同學啲爸爸媽媽話佢哋聽，佢哋依家會上youtube搵番我啲歌嚟聽o架。不過今次concert佢哋問我可唔可以唔好做，問點解成日見唔到我，問我可唔可以快啲返屋企喎。」
唔留戀樂壇
闊別樂壇多年的她對舞台對毫不眷戀，今次復出全為慈善，她指多年來從未想過復出樂壇：「真係冇，出唱片好多嘢要考慮，唔係識唱就得。依家又多新一代，青春無敵，咁我用咩形象去示人呢？既然要考慮咁多嘢，咁就唔好煩喇。曾經好多人叫我出發燒碟，但唔係為慈善我唔會做喇，我又唔係想繼續做呢行。（下次演唱會要等多11年？）唔知o架`，不過短期內唔會再搞喇。」
跌倒冇陰影
為了今次個唱，小恩子不斷從其他歌手個唱中「取經」，曾在好友湯寶如個唱中被裙腳kick親仆倒在台上的她，笑言不會安裝舞台機關：「樓梯都係兩級好喇！不過都係要着長裙，長裙先靚吖嘛！（有冇陰影？）冇，盡量唔着高踭鞋囉，全部着boot，咁就點飛都飛唔到隻鞋出去啦！」她又笑言上次是出師不利：「跌低嗰下心諗：『搞咩呀，第一次出返嚟唱，點解會咁㗎！』今次應該冇事嘅，搵兩個人扶住我可能安全啲！」
攝影：沈健程
場地：香港觀塘帝盛酒店
文：音樂組