滕麗名跳海救200磅麥包
無綫藝人滕麗名（阿滕）昨日到海邊拍攝一場跳海戲，講述以女俠造型示人的她，要落海救200磅的麥長青（麥包），阿滕笑言麥包脂肪夠厚，浮力甚高。
阿滕、麥包昨於西貢為賀歲劇《新抱喜相逢》拍攝一場跳海戲，劇情講述麥包因為覺得阿滕欺騙他而跳海，阿滕見狀即時跳落海營救。阿滕在劇中飾演明星，故昨日她一身誇張的女俠造型，相當搞笑，奈何落海拍攝救麥包戲份時，滿身喱士的阿滕鈎住蠔殼，而本身不熟水性的麥包亦飲了兩啖海水濁親，幸而最後都順利完成拍攝。
特登增肥
要拯救體重達200磅的麥包，實在有點難度，阿滕抵死笑言：「唔怕，脂肪多嘅人係浮啲，而且我學過潛水，都要學救人，雖然我未學到嗰個階段，但都冇問題，佢唔掙扎就得。」不懂游泳的麥包直言經常被兒子取笑，他謂：「上次拍劇跳城門河，導演安排咗個蛙人喺水底兜住我，本來我都瘦咗十幾磅，呢套劇嘅監製叫我增肥番。（你個肚仲大個契妹陳茵媺喎！）佢幾好呀！幾開心，都冇乜點肥過，我都期待佢個聖誕B出世。」
全身風瘌
此外，阿滕向來皮膚容易敏感，昨晨拍攝時，全身包括臉上亦起風瘌，她說：「有一次我同Benz雄（許紹鴻）拍劇，佢要捉住我隻手，我同佢講一陣唔使驚，因為我一定會紅晒！之後佢見到都嚇咗一跳，（你未來老公唔掂得你？）哈哈！所以我個人都好守規矩，掂吓都會有痕。」
文：影視組