林德信自認乖仔 少夜蒲
歌手林德信（Alex）近年經常被拍得出入蘭桂坊，不過他日前接受《娛樂onShow》專訪時，卻自爆「唔夜蒲」、「唔飲酒」，令人大感驚訝！Alex又透露，如果喜歡一個人時，更會不時為對方製造新鮮感，認真乖仔！
林子祥兒子林德信（Alex）去年出道成為樂壇新人，不過他最近除了唱歌外，更在新片《喜愛夜蒲3》有新突破！最近，Alex獲主持人俞詠文（Angela）的邀請，來到《娛樂onShow》接受訪問，並大談戲裏戲外的他。
細個飲太多
不過，當Angela一聽到戲名，她即問Alex道：「你平時都咁鍾意夜蒲，久唔久會喺蘭桂坊見到你，今次你咪可以寓工作於夜蒲？」Alex聽後，即靦覥地搖搖頭說：「其實我唔係成日去夜蒲，我住喺嗰度附近，咁啱行過咋，就畀人影到！」Alex又將其「乖仔」形象進一步強化，自爆不喜歡飲酒：「其實我唔飲酒，我平時啲朋友叫我一齊飲酒，我通常都會避開，可能因為細個喺英國讀書，當地人一出世就飲啤酒，而我細個亦飲好多，可能因為咁，大個之後唔想飲！」
自爆扮Cool
此時，Angela即靈機一觸，對緋聞多多的Alex問：「你會唔會拍拖都係咁，好愛一個人之後就會產生厭倦？」Alex說：「梗係唔會啦！如果我真係愛一個人嘅話，我會搵方法去增加新鮮感。」提到Alex新歌《心靜自然涼》時，Angela就大讚歌曲很適合他，因為跟他一樣Cool，不過Alex就笑言他只是扮Cool，又說：「其實熟悉我嘅朋友，都話我唔係好Cool！好似同公司嘅Robynn & Kendy咁，我哋都合作過幾次，佢哋依家都當我係一個女性朋友一樣，乜都講一餐！」如果想認識更多林德信，即Click入ontv去片啦！
採訪：專案組
攝影：沈健程
髮型：Eve Chiu＠Queen's Private I
化妝：Kirsty Lam