陳茵媺諸葛紫岐搶生聖誕B仔

懷胎約七個月的陳茵媺昨日「谷奶凸肚」，以六位數字酬勞到銅鑼灣「TITONI瑞士梅花表」專門店擔任剪綵嘉賓。懷孕後首度「復工」的茵媺穿黑色露背長裙示人，身形依然苗條的她貪靚穿上五吋船踭鞋兼大晒婚戒和訂婚戒指。剪綵期間，她被突然發放的花炮嚇一跳。問到BB性別？她說：「係囝囝嚟，佢會係個Christmas或者New Year baby。」

剪綵十分鐘覺攰

茵媺又稱會留港生B：「呢個係女性先有嘅經驗，希望好好享受呢個過程，唔會擇日，佢鍾意幾時出嚟就出嚟，呢個責任交番畀BB自己。」她笑言老公陳豪會陪入產房剪臍帶：「佢成日扮醫生，我諗佢唔怕血嘅。」雖然剪綵時間約十分鐘，但大肚婆茵媺亦感疲倦，日後會否再出席活動要看緣分及性質。

有保安跟身的陳茵媺大方為市民簽名留念。	陳茵媺、陳豪	陳父亦有到場睇實愛女。

茵媺指陳豪對仔女性別沒所謂，反而自己特別開心。她說：「我會有一段時間係個仔嘅唯一一個女人。」茵媺表示BB健康活躍，已捱過懷孕初期要攬住廁所不停嘔的階段，口味亦沒因懷孕而改變，但已戒口不吃魚生、不飲咖啡，朱古力也甚少吃。她笑謂：「有時想自己開心都會食少少，飲食都要均衡，BB第日先唔會奄尖。」提到日前發生交通意外，她說：「係人哋撞我，唔係嚴重，不過都做咗檢查，冇事。事後大家都有勸我少揸車。」茵媺逗留了約一小時，由父親、四名保安、經理人、工作人員等近十人「包圍」下慢步登上七人車離開，期間她不時與市民打招呼，十足女王出巡。

諸葛紫岐與茵媺同樣懷胎約七個月，但穿鬆身衫的她肚皮不及茵媺凸。	萬綺雯上前祝福諸葛紫岐。	萬綺雯

薛嘉麟心情緊張

之前在溫哥華安胎的諸葛紫岐，現決定回港生B。昨日她腹部隆起與萬綺雯出席ECCO MOMENTS會員計劃啟動禮活動。問她懷孕多少個月？她說：「就快七個月，自己重咗十幾磅，BB嘅size其實係大，醫生話唔止七個月。（仔定女？）遲啲先講，十二月尾就OK，暫時諗住開刀。（邊度生？）開完會，依家決定咗香港生，因有屋企人照顧，爺爺年紀大唔想佢走來走去。」她又爆老公薛嘉麟心情緊張：「佢好好，好sweet，成日整嘢畀我食，好關心我。佢買咗好多BB嘢，我哋依家都係傾BB嘢多。」提到她之前在溫哥華買了很多BB仔衫，問是否佗仔？她賣關子說：「遲啲咪知囉。」但據諸葛紫岐身邊友人透露，她的確懷有男胎，可喜可賀。

提到陳茵媺預產期在聖誕節期間，諸葛紫岐說：「咁咪同我差唔多！」對於本地父母為子女爭取學位競爭激烈，她說：「睇到新聞開始滴汗，我有問老公點算，佢話生咗先諗。啲人話佗B時要搵小學，好誇張。自己冇諗過會唔會畀小朋友去外國讀書，留畀老公搞。」

文：娛樂組