青雲心潔火海神交

古天樂、劉青雲、李心潔及導演彭順等前晚到中環出席新片《逃出生天》慶功，寰宇老闆林小明亦有與眾星主持祝酒儀式，慶祝該片上畫三天錄得逾800萬票房。

搭腰嗌親密

有網友看完《逃》片後，封古仔與青雲為「火海男神」，對此古仔說：「證明部戲成功，觀眾睇得投入，拍得咁辛苦，成績好都好開心！有朋友睇完話好緊張，拳頭由開場揸到尾。」

馬德鐘再次走進大銀幕。

唐詩詠與古仔在戲中有咀戲。

同獲封為男神的青雲則搞笑說：「古仔係男神，我係火海！（太太郭藹明有冇話你係男神？）冇，佢讚套戲好緊張咋。」問青雲會否效法好友張家輝喬裝入場睇觀眾反應？他說：「咁咪仲引人注意，我同古仔咁黑，熄咗燈都睇唔到啦！」近日有藝人家居遭爆竊，居於村屋的青雲表示不擔心，因家中防盜措施做到足。而青雲與戲中老婆心潔合照時，輕搭心潔腰，他笑言：「仲親密過拍戲呀！」

李心潔獲老公彭順保護，不用拍親熱戲。

古天樂受訪時不斷捉彭順痛腳。

古仔笑導演

彭順被問到是否刻意不讓心潔在戲中有拖手及親吻等情節，他解釋：「我哋做過資料搜集，火場搞唔到呢啲嘢。」古仔聞言即質問彭順：「佢哋逃出咗生天啦，你唔拍？」始終不肯承認錫住老婆的彭順只好辯稱：「閂埋車門你睇唔到啫！（係咪錫住老婆？）拍戲啫！拍佢被火燒咪仲壯烈！」

文：影視組