栢芝四哥同場不相見
張栢芝昨晚攜同兩子返港，澄清自己未有移民加國的決定，由機場返家期間，竟衝燈避尾隨記者追訪。剛巧「前老爺」謝賢（四哥）亦現身機場，但二人同場卻不相見，當聽到「栢芝」兩字，四哥即變臉回道：「家事免問！」
栢芝月前帶同兒子Lucas及Quintus離港，隨即傳出她打算移居加拿大，且於當地置業及為兩子找學校，計劃落地生根，不過有指栢芝會繼續留守娛圈拍戲養家。及至昨晚7時45分，戴墨鏡及口罩的栢芝手拖兩子，終現身香港機場接機大堂，甫出閘即有一男一女友人趨前抱起Lucas及Quintus，期間Quintus不知何故嚎哭，搞到栢芝心痛向在場記者表示：「你哋唔好嚇親佢喎。」
贍養費律師搞
面對半百記者追訪，栢芝態度尚算輕鬆，停步讓大家拍照，不過當提到移民一事，她澄清謂：「我冇講過，啲人講嘅啫，亦冇買樓。（贍養費事件點？）交晒畀律師處理，唔多講嘞。」問到今次返港逗留時間時，她則道：「搞掂加拿大啲嘢先啦。」問到兩子有否惦記爸爸時，栢芝未有回應。在旁的Lucas不時扮鬼臉，栢芝即轉向他說：「唔好咁曳啦。」問到會否與四哥、拉姑會面？栢芝說：「有時間都會。」一行人等最終登上七人車直駛往栢芝家，不少記者車尾隨追訪，司機一度衝燈躲避。
變臉家事免問
至於四哥昨晚八時左右亦現身機場，會合胡楓及Joe Junior飛往西班牙拍攝台慶特備節目。四哥風騷到場，不過卻因前後腳及不同樓層關係，未有與栢芝碰面。當記者提到栢芝與兩子返港時，四哥聞言即收起原本的笑容，變臉嚴肅回道：「家事免問，有冇聽過一巴掌打你黐埋牆呀？（買手信畀兩個孫？）都話家事免問！」此外，前日四哥一身白馬王子look現身中環，與友人歎茶。
文：影視組
攝：追蹤組