法拉靠邊站冇癮快閃

與無綫結束賓主關係的陳法拉,昨晚以台慶劇女主角身份重返娘家舉行亮燈儀式,不過在排位上,卻未有與同劇演員陳豪、黎耀祥齊齊企,反而被冷落掟埋一旁「靠邊站」,大感冇癮的她又於節目未結束便離場。

昨晚無綫舉行《時刻裝備TVB創造46年傳奇》亮燈儀式,為下月19日的台慶揭開序幕。兩大台慶劇《On Call 36小時Ⅱ》、《法外風雲》,以及正熱播的《巨輪》、《最佳女主角》、《星夢傳奇》等藝人傾巢而出,不過陳豪、黎耀祥、楊怡、馬國明、陳法拉、岑麗香等小生花旦均穿戲服示人,性感欠奉,今屆港姐冠軍陳凱琳與亞軍蔡思貝則伴住行政主席梁乃鵬而坐。

演員頻頻蝦碌

無綫今次一反過往錄影傳統,改以直播進行,結果眾藝人頻頻蝦碌又甩嘴,連主持經驗十足的陳百祥(阿叻)也老貓燒鬚,羅鈞滿載歌載舞環節又幾度甩beat,至於鍾嘉欣與魔術師甄澤權介紹節目時竟忘記對白。排位方面,除了阿叻與鄭裕玲站正中位置,兩旁則是兩套台慶劇的藝人,接着便是《巨輪》演員,表面安排看似正路,但身為《法》劇女主角的法拉,卻非與同劇的陳豪與祥仔並肩而站,反而被「擲」到陳展鵬旁邊,絕對是「靠邊站」!以律師打扮的法拉對此謂:「都係身外物啫!(無綫好現實?)唔會,同班同事一齊熱鬧開心吓,之後我都會返嚟幫套劇做第一次宣傳,之後就要度期。(同無綫冇合約身份唔同?)感覺一樣,同合約冇關,(用簽約換視后?)冇咁嘅事,獎同合約係分開。(搵你傾回巢?)近排冇,都係傾劇集宣傳。」不過,法拉並未等及活動結束便提早離開。

祥仔陳豪之戰

至於今年視帝將是祥仔與陳豪之爭,祥仔表示:「都唔係,仲有Sam哥(吳鎮宇)同Cool魔(張智霖),雖然唔知今年係咪繼續係民選,但呢個係一個好大嘅決定因素。」陳豪直言與祥仔合作既有壓力,亦有推動力,他又大讚祥仔:「祥仔與世冇爭,有王者風範,我就……(想奪獎多個喜訊?)今年已好開心,承你貴言啦!」

此外,謝賢(四哥)甫到場表現風騷,分別與鄭裕玲及曾華倩攬腰,又和應屆港姐合照。今年有份拍攝台慶特備節目的他,問到會否要求節目有美女相伴,他即謂:「想死咩!我有女朋友。」

文:影視組