陳君宜巴黎掃大碼鞋
【劉慰思巴黎直擊】名媛陳君宜於巴黎時間9月24日下午2時出席GROUND-ZERO 2014春夏時裝騷，她表示因香港的颱風關係延遲了一天抵達當地：「本來我同班朋友一齊嚟，但依家唔同機，得我一個到先，之後再同佢哋會合。」
陳君宜稱會於10月1日回港，問此行是否順道入貨？她說：「都係，睇吓香港冇嘅心水品牌。（一年飛幾多次？）我一年飛好多次，之前滑雪整親腳先冇飛。（會否購物？）我帶咗好多空篋，主要嚟掃鞋，我好大對腳，成39、40號，香港真係好難買鞋。」她笑言自己最瘋狂試過一次過買十多雙鞋回港，連家裏的鞋櫃亦要特別訂造。