周秀娜約「新歡」 北京開餐
「宅男女神」周秀娜前晚以一身醒神藍色造型出席啤酒活動，現場有男女參賽者大鬥身形，娜姐見到一眾半裸上身男參賽者，忍唔住以手指篤其中一名參賽者的胸肌，她笑言：「呢排睇張家輝嘅戲，好多男仔夢寐以求想操到好似佢咁，杜汶澤都操到好大隻！（揀男友一定要胸肌男？）我揀男友睇性格、品格同上進心，有肌肉係bonus。」
提到之前被《好報》拍到又拖又攬一名內地「科網CEO」，她稱對方只是朋友：「佢有風度扶我，（攬？）道別嘅普通禮儀。」她透露對方做生意，又大讚對方：「佢做嘢好積極，（對方係富二代？）唔知，做朋友唔會睇對方有冇錢、咩背景。」問到有否發展機會時，向來直話直說的她變得支吾以對，其後暗示跟對方有發展機會：「個個朋友都可以有發展可能，主要係啱傾同睇性格。聽日（昨日）會去北京做一日嘢，如果有機會會同佢食飯。」
Avis預演結婚
另外，娜姐舊愛陳偉成（Avis）最近孖住女友尹蓁晞（Yumi）參演有線劇集，導演刻意安排二人飾演冤氣未婚夫婦，當中有結婚和派喜帖情節，二人可謂攞正牌拍拖兼預演結婚，兩人戲裏戲外同樣恩愛，大晒幸福。Avis還自度對白冧女友，對着Yumi大叫：「除咗Yumi，我邊個都唔要！」二人又表示：「雖然未有結婚打算，但係預演吓派帖都幾得意，原來真係好開心。」
文：名人組