Jocelyn受寵 老公捉雞搵銀
名模夫婦Jocelyn及Anthony均熱愛運動，全因他們有一個紮紮跳的童年，時常舉家到戶外活動。Jocelyn笑言自己被家人寵壞，於求學階段從未打工賺錢，但Anthony卻做過很多工作賺取外快，就連最辛苦的「捉雞」也做過，豐富了人生經歷。二人已協議將來要讓子女多接觸大自然，同時亦要好好教他們理財，實行做家務換零用錢，讓他們知道金錢得來不易。
口述：Jocelyn、Anthony
J：Jocelyn
A：Anthony
停練舞識男仔
J：我同你都鍾意做戶外活動，其實都同我哋嘅家庭背景有關。我仲好記得我細個喺夏威夷長大，每逢星期六、日都會成個大家族去燒嘢食、露營、捉蟹等，成日喺室外紮紮跳，所以我都好想將來嘅小朋友喺夏威夷長大，等佢有好多家人陪佢一齊成長。
A：我雖然係屋企嘅獨生子，不過我屋企人都好鍾意帶我去戶外玩，每逢周末我爸爸、媽媽都會帶我去玩越野電單車，同埋每個月我哋最少都有兩、三次，十五個家庭去露營，有成百幾二百人，好熱鬧！其實父母對子女嘅影響好大，我爸爸揸電單車好叻，耳濡目染之下我都好沉迷。仲記得16歲嗰陣，每逢星期六晚我啲朋友都出晒去飲酒、clubbing，但係我會留喺屋企洗車、抹車，等星期日朝早出車！其實畀小朋友熱忱於運動，唔單止令佢嘅生活健康好多，亦可以免卻好多麻煩。
搵到最佳伴侶
J：冇錯呀。我高中時係band嘅成員，負責吹色士風。每逢放學都會喺band房練歌。5歲到14歲一直學跳芭蕾舞，以前諗過做芭蕾舞家，每日都好努力練舞，返屋企都練。直至到後來我嘅成績太差，媽媽就叫我唔好再跳，但一冇跳舞，就成日同男仔出街、睇戲。
A：咳咳！睇嚟我哋應該轉個話題。
J：哈哈，不過我依家都搵到宇宙裏面最好嘅男人啦！
賣報紙贏單車
A：如果我哋將來生咗小朋友，一定要畀佢喺10歲前嘗試多種唔同嘅運動，等佢搵興趣。其實有好多細個嘅回憶，都同單車有關，仲記得我12歲嗰陣，因為遲到揸咗架好靚嘅BMX單車返學，但畀人偷走咗！嗰時真係好傷心，因為嚟緊嘅星期五、六、日、一都有比賽，咁就錯過咗四個比賽。
做Model冇收錢
A：嗰時我第一份工係派報紙，用咗港幣80蚊左右買架新單車。公司咁啱搞咗個比賽，員工搵到60個人訂報紙，就送機票去日本一星期，搵到58個人訂報紙，就送一架BMX單車。當我見到呢個比賽，就同媽媽講一定要搵到58個人訂，我要拎到架單車。我媽媽問我：「點解唔去日本？如果你真係搵到60個人訂，你就照去日本，我買架新單車畀你。」我真係逐家逐戶拍門問，成功搵到60個人訂，最後去到日本，媽媽亦遵守承諾買新單車畀我，真係好多謝佢！
J：我其實由細到大都冇打過工，可能屋企人真係太保護我，模特兒已經係我嘅第一份工作。不過喺我12歲嗰陣都試過同細佬喺屋企出面擺檔，用啲卡紙整牌，然後坐喺條街度賣喺屋企花園摘落嚟嘅杧果同荔枝。都有啲隔籬鄰舍幫襯o架，可能覺得我哋太可憐！仲有，另一個工作經驗係喺我去咗澳洲做模特兒，室友叫我去bar度幫手，嗰時冇工作證，所以我冇收過人工。但因為好好玩，所以我冇錢收都繼續幫手。
A：我就做過好多唔同嘅工作，除咗派報紙，仲做過洗車、DJ、快餐店、派書等等。不過要數最辛苦嘅工，實在係非「捉雞」莫屬，嗰時我18歲，銀行戶口得番30加幣，要每日凌晨12點開始做嘢直到朝早八點。我要喺一個放咗大概五萬隻雞嘅雞場去捉雞，再放入籠，一直重複八個鐘。份工好辛苦又好臭，只得240蚊港幣一日！所以做咗一日冇做啦。
J：呢個都係一個好難忘嘅經驗呀！
訓練仔女理財
J：我哋將來一定要好好咁教仔女理財。要幫手做家務先至攞到零用錢，好似洗碗、拖地咁，總之畀佢哋知道搵錢係唔容易，唔可以攤大手板問我哋攞錢。又或者要佢哋考試成績好，就畀少少零用錢作為獎勵。
拒做怪獸家長
A：冇錯，不過依家香港嘅教育制度令小朋友好大壓力，放咗學之後要去補習或者學課外活動。當然我都會望子成龍，不過最重要都係畀佢哋有個開心、快樂嘅童年。我覺得我一生人最大嘅成就，係我嘅仔女同我講「多謝你呀爸爸，我嘅童年真係過得好開心！」而唔係「多謝你呀爸爸，你以前係咁逼我讀書，我依家賺到好多錢啦！」
服裝：Sandro @ Lee Gardens Two
場地：Amaroni's @ Hysan Place
筆錄：龔凱欣
攝影：劉智源