李玟儲卵子 期待混血BB
每個女人在深愛的男人面前都會打回原形，想不到華語天后李玟（CoCo）也難逃愛情魔力，在加籍老公Bruce身邊，天后都變大傻瓜，即使兩公婆有時天各一方，亦堅持將刷牙、落妝的生活瑣事用facetime與老公遙距調情。婚後生活雖然幸福爆燈，不過數數手指，三十有七的CoCo，終究希望有個愛情結晶品，受到好友啟發，有衝動趁健康儲定卵子，為混血BB做足準備。
我同Bruce結咗婚兩年，一齊咗十年。當年我啱啱拍完電影，好鍾意匿埋喺屋企，但我家姐又逼我出去食飯，入到餐廳，咁啱隔籬枱撞到一個五年冇見嘅朋友，佢同我傾傾吓就介紹咗個朋友我識，當時唔知佢係邊個，淨係知佢叫Bruce。第一眼就覺得佢好靚仔，傾偈時覺得佢好有自信，講嘢好幽默，我好鍾意。最重要係，我睇佢眼神就覺得係一個善良嘅人，佢畀我感覺同氣質都係個good guy。我哋一傾就好有默契，好有化學作用，不停講講講，第一次講電話，就講咗成四個鐘，好似有講唔完嘅話題。
帶埋電燈膽約會
但係我好怕醜，係唔會做主動，永遠都係被動，我哋第一次約會，因為太怕醜而要帶埋我家姐出嚟做電燈膽。Bruce永遠同我講嘢，我都唔敢正面望佢，佢成晚都睇住我頭殼頂。我覺得當你好愛一個人，就會覺得自己傻傻哋，大傻瓜一樣，例如見到個太陽，就覺得點解個太陽會曬住我？係咪因為知我戀愛中？又例如見到舊雲，就會覺得佢個形狀係心形。
其實好耐之前，大家都已認定對方係結婚對象。有次喺我一個生日派對上，以佢一向好低調嘅性格，照計唔會喺好多人面前向我求婚，不過佢就好畀到驚喜我，喺我屋企人同朋友面前向我求婚，哎呀！好感動呀，我就即刻應承咗。
全心全意愛到死
我覺得最sweet係平時佢忙住工作，但喺佢返屋企前，我都會安排晒佢最鍾意食嘅嘢，有時我會畀驚喜佢，安排佢去鍾意嘅餐廳，或者佢好鍾意一個蛋糕，我就會喺外國訂返嚟。至於佢點氹番我？我同佢一齊就自自然然好開心，係對方嘅好朋友，我唔需要物質，花心機去聽對方講嘢，做一個好嘅聆聽者，已經係一份好好嘅禮物，佢成日會同我傾偈，大家分享今日發生咗啲咩事。不過有時周圍飛，見唔到大家，但一見到佢打電話畀我就好開心，有時玩facetime感覺到佢喺身邊，因為啱啱起身，我會將個電話放喺前面，佢睇住我刷牙，又睇住我梳頭、落妝。我覺得兩個人一齊真係唔可以偷懶，要花心思去經營，同埋在乎對方，我係好錫佢，一愛佢就百分之一百愛到死，但同時都要畀佢空間，正如佢鍾意打波，我都會好支持佢。
已有兩個小朋友
我都有計劃生BBo架，如果有，係上天畀我嘅一份禮物，但如果冇呢？It's okay，我會平常心，慢慢嚟，呢啲唔急得。老公好支持我，反正佢已經有兩個wonderful kids，所以我唔急嘅。依家科技咁發達，好多人年紀好大都可以有kids，我依家30幾，仲有時間。前排我有best friend喺紐約做咗儲卵子手術，我覺得呢個好主意，但我未去做，因為依家仲係算健康，不過聽講好痛、要打針，都係要諗吓先。
後記：新碟收錄「全世界」
今次新碟《盛開》是CoCo榮升人妻後首張大碟，事隔四年再出專輯的她決定以「愛」為主題，她說：「愛有分唔同層次，例如喜怒哀樂，我都將佢哋放入歌詞入面，呢四年好多轉變，結咗婚，感受到愛，同埋經常出去旅行，想重新搵番自己。」
四年中，CoCo與老公、家人經常環遊世界，更將所見所聞融入新碟，歌迷聽歌彷彿與偶像同在旅途中：「《叩叩》似歐洲跳舞曲風、《愛的副作用》似熱帶地方的編曲，《盛開》因為去完維也納睇咗好多歌劇，就索性玩咗段歌劇。」眾多情歌都是講述CoCo的感情世界，她自稱今次是最感性和真情流露的一張大碟，實行以歌唱出心事來。