陳浩民照顧妻女 裙拉褲甩

蔣麗莎臨盆在即，陳浩民特地返港陪產子。

據悉，浩民剛完成一部內地電視劇拍攝工作，即向經理人公司申請停工一個月，中秋前返港陪伴計劃下星期剖腹產子的老婆，實行人月兩團圓。昨午浩民偕同太太、囡囡，以及兩名女親友現身世貿中心某酒樓歎茶，食飽後即改往商場內shopping，樂也融融。日前發高燒入院的雅薷病愈，精神奕奕拿着父親的手機狂撥，又不時要求落地奔跑，相當可愛，而即將臨盆的蔣麗莎雖腹大便便，但卻全無影響行動，只間中用手托着巨肚，旁邊的浩民亦會體貼攙扶，不過由於雅薷喜歡黐着浩民，同時要照顧一大一小，浩民可謂分身不暇。

• 食飽後的陳浩民帶着太太和囡囡往商場濕平。

剖腹生產

當發現有記者在場拍照，浩民夫婦顯得相當大方。蔣麗莎更向記者表示：「我太瘦胎又太大，至今已量得BB有八磅多，醫生建議我開刀，我也擔心他（醫生已證實今胎是男嬰）這幾天會忽然跑出來。」問到浩民打算送甚麼獎勵太太，他竟幽默謂：「仲送？佢送咗個女畀我，我依家咪送番個仔畀佢囉。（BB改咩名？）未知呀，要睇埋出生時辰再決定。（擔心囡囡呷醋？）咁又唔會，佢仲經常指住媽媽個肚叫弟弟添。」而浩民夫婦最終選購了一對BB鞋，雅薷主動幫手拎，果然甚有大家姐風範！

文：影視組