徐子珊全裸搞定欣打冷震
黃宗澤（Bosco）於新劇飾演有錢佬，更在太太胡定欣「隻眼開隻眼閉」下風流喪玩女，不過現實的Bosco卻大叫唔敢：「湊咁多女人好煩，搞唔掂。」與定欣拍「全裸」浸浴戲的徐子珊，則笑言「打晒冷震」，絕不會中途轉「基」！
無綫小生黃宗澤、徐子珊、胡定欣及梁烈唯等，昨日現身土瓜灣拍攝新劇《點金勝手》，Bosco於戲中利用警察及記者布局，侵吞公司主席羅樂林身家，現實中投資有道的Bosco則笑言：「呢啲真係學唔到，我哋係實力嚟o架，一分努力一分錢。」有傳其身家超過半億，他說：「我都想好多億，你哋抬舉我啫，身家呢啲係秘密，成日揭畀人睇咩。」
唔敢一腳踏幾船
提到劇中「有錢佬」Bosco不斷偷食、玩女人，老婆定欣也「隻眼開隻眼閉」，Bosco卻謂：「邊有o架！要去到某身份、地位，女人先有咁嘅諗法。（會偷食？）要湊咁多女人好煩！（試過一腳踏幾船？）冇，我都唔敢，我會搞唔掂。」
扮演「假TBG（女同性戀者）」的子珊，透露將與女演員拍親熱戲，日前亦已跟定欣拍浸浴戲，不過她笑言好緊張：「我同定欣扮冇着衫一齊浸浴，我仲要幫佢整頭髮，真係打冷震。現實中有女仔向我表示過，但我對呢樣嘢有少少卻步。」
拒評論無綫被罰
另無綫遭通訊局裁定違反競爭法，判罰90萬元，Bosco認為此事未輪到演員評論。談到台灣藝人自由度大，會否覺得無綫合約抹殺機會？他說：「唔同地方有唔同規定、法律，我諗最後交由政府規定啦，娛樂圈要不停進步。」子珊表示作為旗下藝人，會尊重公司合約內容及精神，定欣則謂：「大家喺呢種模式下工作好長日子，選擇喺無綫工作，簽約前都知係咁，我覺得呢個平台十分適合我。」
文：影視組