城城愛紅姑夠天然
育有三名子女的「千億新抱」徐子淇，昨日被天王郭富城大讚是皮膚最好的太太，臉上一條紋也沒有，天生麗質。城城還表示只愛天然美，而心目中的女神就是紅姑鍾楚紅。
昨日郭富城與徐子淇一同出席Sulwhasoo慈善活動，二人言談甚歡。他透露跟子淇大談護膚心得：「我讚佢皮膚好，雖然已經有三個小朋友，但一條紋都冇，佢係我見過keep得皮膚最好嘅太太，天生麗質！」記者指戀愛中的人有滋潤特別容光煥發？城城即笑說：「冇諗呢樣嘢，我覺得自己做演唱會時狀態最正，最重要係心境開朗。」
大家年紀差不多
問到會否整容時？他連講六次no：「I like姜文style，佢之前話好難搵女主角，因為想揀天然，我都鍾意天然美，好似鍾楚紅咁，佢係我心目中女神，可惜佢唔拍戲，我寫緊劇本，寫完畀佢睇吓，希望佢會考慮！（想佢做咩角色？）梗係做我partner，佢同我年紀差唔多。」城城稱擇偶條件也要天然不可加工，不過內涵才最重要。對於王菲和李亞鵬離婚？城城稱不便評論；那他是否怕離婚才不婚主義？他笑說：「我已經同我嘅工作結咗婚，我嘅作品就係我嘅BB。」
曾拍MV女兒驚訝
被城城稱讚的子淇也不忘回敬說：「佢先keep得好，我諗佢以為我好老，因為我已經有三個小朋友，我同佢講我好後生就生BB，所以以我年紀皮膚係差唔多。」她笑言日前在家中唱卡拉OK時，剛好播放由她為陳奕迅擔任女主角的MV，令女兒大感驚訝：「我同佢講嗰陣係媽咪細個，跟住囡囡又問個男仔係邊個？我老公答係佢細個，但陳奕迅同我老公根本就兩個樣，搞到我個女好混亂。」子淇笑言幸好該MV沒有親熱鏡頭，亦從沒拍過親熱戲，否則不知如何向女兒解釋。
文：名人組