冬叔出山陪你中金多寶

今次冬叔限定復出做嘉賓，原來有附帶條件，佢話：「我同亞視高層講，要我復出做嘉賓都得，但一定要劉素芳做我嘅拍檔，因為佢係第一代六合彩女郎，同我合拍咗7年，有默契、有火花之餘更會勾起觀眾回憶，實行令經典重現。」

利智當年成為亞姐冠軍後，曾為六合彩做嘉賓。	冬叔話吳君如未撐過佢場。	冬叔同劉素芳曾扮成財神、仙女，仲搵咗米雪做嘉賓。

大水壺遙控

講番主持六合彩18年嘅經典事，冬叔話多不勝數，而利智做嘉賓就令佢最有印象：「嗰時每逢大時大節，我哋都會請嘉賓上嚟。有次撞正利智當選亞姐，佢人氣勁，梗係搵佢啦！嗰次完咗節目，我哋搵咗素芳個朋友車利智走，但去到銅鑼灣就畀警察抄牌，雖然利智幫手求情，但可能因為佢廣東話唔正，個警察認為有『陰謀』，最後都係照抄牌！」

冬叔仲話，有次有隻大水牛走咗入海底隧道搞到大塞車，令監製、導演去唔到現場，好彩嗰陣時啱啱有「大水壺」手提電話，咁先可以遙控做到直播。

君如唔畀面

冬叔身為六合彩Icon人物，好多街坊都會問佢攞貼士，問佢個女吳君如有冇問埋一份？冬叔竟然話：「以前雖然有好多同學仔想借君如過橋，問我攞貼士，但君如係大情大性嘅人，冇諗過有橫財命，老竇一直靠主持六合彩養家，佢反而未撐過場。」