王韾平信是有緣

娛樂圈這一行就是這樣，一旦跟你名字扯上過關係的，這一輩子也跟着你，王馨平（Linda）與鄭嘉穎就是一個例子。早前Linda父親王羽忽然在報章上高調評論鄭嘉穎，媒體又連番報道，Linda苦笑說：「其實我真係唔想講太多，畢竟都係私人事，而且亦已經過去，我都結咗婚咁耐，都要顧及我先生嘅感受，不過佢好好，好體諒我；好似之前Daddy出席活動講咗呢啲嘢（批評鄭嘉穎），其實係有記者喺度搗亂，加上我Daddy老人家講嘢可能唔係咁清楚，我當時都嚇一跳，同老公商量過，就第一時間搵咗嘉穎先，同佢道歉，嘉穎話唔緊要，佢會處理，我仲話得閒要請番佢食飯！（老公唔介意？）唔介意，我同佢乜都會講，其實我老公都有好多情史，係我奶奶爆畀我聽，只不過佢唔係呢個圈，冇人會問啫！」王馨平的丈夫李家輝，也就是王羽口中高度評價一個男人，與Linda相識於千禧年，始於一場「相睇」飯局。

相睇結緣

在這個可以於互聯網上識男結女的廿一世紀裏，「相睇」這回事就等同黑白粵語長片，過時又令人為之抗拒，Linda笑說：「陳美齡嘅媽咪一直同我嫲嫲講想介紹一個男仔畀我識，不斷安排，前後都有三年，我推無可推，就當應酬吓老人家出去一次，出咗一次，第二次，之後好快就拍拖，一年後結埋婚。我從來都唔信相睇，如果身邊有朋友去相睇，我甚至會笑佢哋，估唔到會發生喺自己身上，除咗緣分，就諗唔到第二個解釋！」

王馨平與夫婿李家輝結婚十二年，二人相敬如賓，幸福快樂！	王馨平父親王羽早前於台北電影節再封影帝！	王馨平與鄭嘉穎再見亦是朋友，二人至今依然是好朋友。

Linda形容丈夫性格穩重成熟，做事淡定，脾氣異常地好，跟出名火爆的父親是兩碼子的人，她笑說：「Daddy話從來冇見過一個咁好嘅男人！細細個屋企就只有Daddy講，我哋聽，佢就係一家之主，我諗喺Daddy心目中，男人就係咁，所以佢覺得老公係一個好唔同嘅男人。我哋結婚十二年，老公發過五次脾氣，每次都係我撩起佢把火，但佢一發脾氣時，我就會即刻講『你好有男子氣概呀！』佢一聽到就鬧唔出，但又仲嬲緊，咪忍住笑囉！因為老公太少發脾氣，我係真心覺得嗰刻佢好man而咁講，估唔到咁就可以氹番佢！」

王馨平（右二）閒時會打扮靚靚出席活動，輕鬆一下！	王馨平與周慧敏（右）識於微時，二人一直是好朋友，她大讚對方是一個很有智慧的人！	王馨平

Linda於香港出生，三歲時候父母離婚，父親帶着她到台灣，在台灣讀書長大的她，到現在廣東話都帶着點台灣腔音。父親出奇地沒有反對她入行，一直醉心唱歌的Linda，在樂壇成績非常好，五年已推出十四張唱片，曾是不少男生的夢中情人，當年丈夫李家輝也是她的粉絲，會自掏腰包購買她的唱碟。直至千禧年，已屆三十歲的Linda事業去到樽頸位，上天就安排現任丈夫的出現，基於已到適婚年齡，二人很快決定結婚，踏入人生另一個階段。

火爆俠女

結婚不同做歌手，這首歌hit不起，就等下一首金曲，沒有幾多首《別問我是誰》，她續說：「結咗婚就唔好輕易分開，結婚前我同老公講一句話，我話依家你見到我嘅全部係優點，最好嘅一面，但我係有缺點嘅，你唔好要求我改，我亦唔會要求你改，我哋要學嘅係包容！」比她年長七歲的李家輝，當然明白箇中意思。

二人婚後一直生活幸福愜意，Linda笑說：「其實我係一個好火爆嘅人，可以話係俠女，我可以因為人哋泊車泊咗我想泊嘅位而嬲到舉中指，老公改變咗我好多，佢令我變得冇咁衝動，有耐性咗，所以成日有人問我兩個人相處之道，我就覺得只要搵一個性格、脾氣都好嘅人，咁就可以維繫！」這句話，也是已故白龍王的人生座右銘。

後記：入行至今，王馨平的外表沒有太大變化，依然漂亮溫柔（撇除她自爆會舉中指的時候）！曾經有人問過男人A：「你的太太怎麼可以多年來都這麼美麗？」男人A說：「不是她保養得宜，而是我的功勞。我沒有事要她操勞，每天讓她過得快樂，一個人沒有憂慮，就會由心美出來！」這可是Linda丈夫的心聲嗎？不管甚麼，總之就肯定不會是整容啦！

玉女大解放

王馨平雖已淡出娛樂圈，但她笑言最愛就是唱歌，至今還有歌癮，剛於八月底她便偕一眾寶麗金的歌手開演唱會；Linda一身中門大開服裝（圖），十分養眼，成為全場焦點，「玉女」地位依然穩如泰山！

採訪：Ada Lam

攝影：沈建程