富貴陳凱琳家人恐遭綁架
應屆港姐冠軍陳凱琳參選時被傳媒「起底」家住九龍塘獨立屋，有米程度不言而喻，由隱形富豪到富貴家境曝光，陳凱琳接受專訪時透露，家人十分擔心遭綁架，但不會考慮請保鏢。蔡思貝率直的性格令人覺得她囂張，然而自我的她卻表示做事對得住自己良心，從來說話冇立壞心腸。
港姐冠軍陳凱琳、亞軍蔡思貝和季軍劉佩玥日前接受本報專訪，居住在九龍塘獨立屋，家底億億聲的陳凱琳，自言生活並不是大家想像中的千金小姐要乜有乜，強調屋企只是中產家庭，在加拿大讀書亦如普通學生般，要做兼職賺取零用錢，曾在日本餐廳工作及服裝售貨員，父母從小灌輸搵食艱難訊息，「家教」食飯要check單，她說：「Daddy話出去食飯要攞單、check單，食嘢要知價，要我哋明白錢唔係易賺。」
8歲立志選港姐
陳凱琳家底豐厚難免被起底指指點點，她說：「屋企只係中產家庭，我唔係介意畀人咁寫，係嫲嫲驚畀人咁寫，驚可能會畀人綁架，老人家會驚啲，因為唔係真先驚。」陳凱琳笑謂未去到要請保鏢保護安全。
五歲舉家移民加拿大的陳凱琳，1999年時為八歲的她，返港在一次偶然機會下從電視上看到郭羨妮奪得后冠，自此便立定要選港姐的目標，故今年大學畢業即返港報名參加港姐，即使錯過大學畢業禮也未感可惜，她說：「總算實踐咗8歲時嘅夢想，細佬12月畢業，到時參加佢嘅畢業禮感受番。」對於近日被翻舊帳指她年輕時皮膚黑又齙牙，陳凱琳承認有箍過牙，年輕有年輕的不同：「我有睇過家姐段留言，有啲斷章取義，佢冇同我比較，文尾仲話以我呢個妹為榮。」
蔡思貝曾到新西蘭和德國讀書，加上19歲在歐洲流浪一年體驗文化，因而培養出率直性格，但流浪時她卻要靠另類職業賺取生活費，蔡思貝說：「自己好鍾意小朋友，搵咗一份幫人湊仔嘅工作賺錢，要負責照顧三個小朋友，所以湊小朋友好叻。」蔡思貝又指今年暑假返港原本打算上網報讀課程，但卻發現港姐招募，由進修變成遞表報名參選港姐。
「有人覺得我寸」
講到決賽夜在台上聲言自己會奪得冠軍，令原本覺得她性格率直真誠，頓轉成覺得她有點囂張，影響觀眾投票給她，蔡思貝表示沒有後悔，不覺得一句說話能影響賽果，若果重新選擇也會是這個答案，她說：「我當時咁答係希望娛樂大家，大家對我有啲誤會，有啲人可能會覺得我寸，自己嘅信念係希望我對你真，你都會對番我真，起碼對得住自己良心，從來說話冇立壞心腸，絕對冇惡意。」
場地：Amaroni's (Hysan)
服裝：MAX & Co
採訪：影視組
攝影：劉智源