薛家燕百萬拍微電影細路擔正

藝人薛家燕早前豪擲七位數,大搞由小朋友演出的微電影及大匯演。她更親自監製改編真實故事的《信望愛》,主人翁熊子逸也親身上陣,重演捐骨髓給4歲細佬熊子豐的過程,劇情令人為之動容,子逸更獲頒「最佳女小演員獎」。

薛家燕投資的「家燕媽媽藝術中心」日前假柴灣青年綜藝館舉行《威露士呈獻:家燕媽媽微電影首映大匯演》,邀得好友黎小田及張同祖等擔任評判,並招待200多位來自中、港、新加坡三地的學生來交流。當中由家燕姐監製的微電影《信望愛》,故事內容則是改編自其學生熊子逸的真實故事,講述其4歲細佬熊子豐患白血病,母親為他四處尋覓適合的骨髓,可惜連子豐哥哥的骨髓都用不着,結果發現9歲的子逸卻很脗合,作為家姐的她亦勇敢地捐骨髓給子豐。

奪最佳電影獎

子逸於片中親身上陣做自己,她表示拍片並不辛苦,相反覺得很好玩,並謂:「捐骨髓前12小時唔食得嘢,又唔飲得水,不過一啲都唔辛苦,因為之前食咗pizza填飽個肚。(捐骨髓時想退縮?)唔會,雖然有啲緊張,但過程都唔痛、唔驚,因為我好想幫到細佬,覺得可以救到佢、令佢好番,我好開心,瞓醒後第一時間都想見細佬。」

大匯演當日,大會更頒贈「最有愛心信念大獎」、「最佳女小演員獎」給子逸以表讚揚,她說:「好開心,多謝家燕媽媽畀個咁好嘅平台,讓我哋可以到處演出。」而《信》片亦奪得「最佳電影」獎。

感動到眼濕濕

家燕姐也大讚子逸好勇敢,她說:「都幾驚因為會有危險又痛,但家姐得9歲,佢竟然同媽咪講,『我一定要救細佬,佢需要我幫手。』,之後細佬做化療甩頭髮,家人都幾擔心,點知接受骨髓後,細佬血型改變咗、康復咗。套戲個個睇到眼濕濕,我自己都幾難過,但子逸做得好好。」

今次家燕姐豪擲逾百多萬元,於個半月內完成六部微電影,她直言細路哥最難拍,而電影中均由小朋友演出,她說:「希望帶動大家關注小朋友,因為冇人拍小朋友嘅戲,係要有愛心同耐性去拍。人哋問我點解咁忙重投資咁大,能夠帶出感人一面,見到佢哋演出有成長,我已經好開心。」家燕姐又希望學生們可以親身體驗拍電影,並透過角色去珍惜面對困難時,家庭、兄弟姊妹、父母給予的愛。

文:影視組