徐子淇細仔得意 心郁想再生

昨晚徐子淇、全智賢、歌手李玟、台灣型男張震，以及名流雷禮權等出席時裝晚宴，全智賢穿tube dress現身，見記者笑容滿面並揮手，只拍照，未有做訪問。而全場的風頭躉，非徐子淇莫屬，穿上一襲火紅色吊帶晚裝的她身材苗條，難以相信她是三子女之母，問她如此性感，事前可有給老公李家誠過目？她稱是大會安排，晚裝性感一點可接受。

做仔女校車保母

提到學期剛開始，她說：「大女升小一，三個嘅放學時間都唔同，每日都要接送，我直情係校車保母，呢排開學好多記者喺學校門口等，我唔想佢哋曝光，所以要行後門；細仔第一年返學都有喊，佢得兩歲，但已經有功課做，返咗兩禮拜學都無打開過書包睇，點知原來有功課，湊佢哋連抖氣都無得抖，（訓練佢做尖子？）最緊要囝囝開心，以前睇過一個新加坡狀元，成績好好，但後來壓力太大跳樓，見過呢啲嘢，明白到行行出狀元，就算囝囝將來畫畫都OK。（是否有意再造人？）見佢咁得意，都心郁郁，但無時間。」昨午子淇陪老爺恒基兆業主席李兆基（四叔）出席以自己命名的香港科技大學「李兆基商學大樓」揭幕儀式，四叔問科大校長陳繁昌知道科大的學費每年數萬元，子淇自爆：「熹熹一年學費都要十幾萬。」但未知她所指是兩歲兒子李俊熹還是女兒李晞彤，千億B學費都咁高，才配合身份呢！

任達華送女手袋

此外，與全智賢因拍戲而成為好友的任達華，表示晚宴可以跟全智賢慢慢傾，他又透露女兒任晴佳愈大愈可愛，變得好貪靚，每天都會揀手袋上街，笑言自己是女兒的男朋友，得閒便會買手袋送她，將來女兒若拍拖，自己一定眼淚在心裏流。全智賢昨午12時50分從韓國乘機抵港，由四名外籍保鏢護送步出閘口，同行還有一名韓國男子。

文：名人組