杏兒冧爆《衝II》迷
忙於在內地搵人仔的吳鎮宇，於《衝上雲霄Ⅱ》中因演Sam哥一角大受歡迎，但他因不想向內地劇組因請假而賠錢，無奈缺席昨晚《衝Ⅱ》的結局活動，相反胡杏兒為力爭上陣造勢，卻甘願冒上請假賠錢之險，從北京劇組返港出席宣傳活動，結果她與眾演員令全場觀眾High爆。
無綫昨晚於將軍澳新都城商場，為大熱劇《衝上雲霄Ⅱ》舉行結局活動，吸引逾千人圍觀，一同收看兩小時結局。靈魂人物Sam哥吳鎮宇身在內地拍劇，故焦點落在Cool魔張智霖（Chilam）身上，他率領陳法拉、胡杏兒及胡定欣等演員現身，Chilam與法拉到場時，全場觀眾喝采，期間大會以聲音大小為準則，要求選出法拉最後應情歸何處，觀眾多數揀Chilam。
法拉搞笑露一點
及後眾演員與觀眾齊放竹蜻蜓，祝願結局收視報捷，Chilam誇口望收視60點，笑指人人露兩點便夠晒數，法拉笑指只能露一點，杏兒就抵死謂：「收視有60點，Chilam同法拉就重現古堡嗰幕，仲要係未刪剪版。」於劇中未能追到江美儀的單立文，竟向美儀謂：「原來你係狼虎之年，估唔到你咁淫賤，唔啱無綫規矩。」
於新經理人公司同事陪同下出現的Chilam，直言對劇集結局感不捨：「今次劇集主題係守護，多謝觀眾一直守護Captain Cool，之後會繼續畀好戲大家睇，今日呢身打扮唔會係最後一次着。（係咪拍電影版？）梁家樹係有講過，始終係大製作，最快明年先成事。」對於鎮宇自爆身價不及他，Chilam笑謂：「佢先係有錢人，唔好信佢，咁我身價不嬲咁高。」
杏兒冒賠錢之險
杏兒從北京請假返港，她謂：「唔想畀大家覺得冇幫手宣傳。（收視壓力？）唔係我壓力，知大家好鍾意套劇，再開第三集囉。到時我都40幾歲，可惜今晚Sam哥嚟唔到，我同劇組簽咗約，返嚟差啲要賠錢。」
法拉對於Chilam落實拍電影版，直言也想參與，但未有人接觸她：「好想電影版同Captain Cool一對，今日揀咗Sam哥，下次試新口味，今晚希望過40點收視。（點慶祝？）睇兩個型男點配合。」談到有指她簽約鍾珍，法拉透露現時的確由對方安排接工作，提到曾志偉也有意捧她為張曼玉第二，法拉對此表示沒多想，只要有戲拍就可。
文：影視組