影星姬蒂賀姆絲（Katie Holmes）前日拖實受傷斷臂的愛女蘇莉（Suri）外出，右手打上石膏的蘇莉全程扁嘴兼扭計，有指作為父親的影星湯告魯斯（Tom Cruise）無視女兒傷勢，一心掛住溝女！
姬蒂發言人日前透露蘇莉意外整斷手臂，傷後一直未有露面的蘇莉，前日以「獨臂」造型與姬蒂於紐約街頭現身，其右手臂打上石膏，繃帶上寫滿親友祝福語句，最搶眼的一句為：「唔好用石膏打屁股」，認真搞笑！蘇莉雖然只有一臂，但仍堅持用左手攬實公仔毛氈及拖實阿媽，其痛苦表情明顯表示吃力，之後更一度扭計想喊，姬蒂即半跪呵番女兒，耐性十足。
雖然愛女斷臂大件事，但身為老竇的靚佬湯卻不聞不問，事關離婚後做足一年寡佬的他，最近終覓得省鏡新歡、前《體育畫報》（Sports Illustrated）水着女模Jessica White。據悉Jessica棄天主教轉投科學教，密密於Twitter留言引靚佬湯注意，最終成功「釣大魚」，二人見過一次面即打得火熱，而Jessica亦獲靚佬湯介紹電影監製，鋪路入行拍戲。
另邊廂，《色慾都市》女星莎拉謝茜嘉柏加（Sarah Jessica Parker）日前湊孖女Tabitha與Marion外出，莎拉以街坊裝Hea住示人，相反孖女就獲悉心打扮，着得色彩繽紛，非常可愛。同日孖女由保母帶往公園玩，二人見「無王管」即化身「甩繩馬騮」，衝入水池戲水，玩到全身濕透消暑！
文：外娛組