倫永亮開騷寸爆chok峯

倫永亮前晚在伊館為一連兩場的《倫永亮ONE VOICE TEN FINGERS演唱會》揭開序幕，由於撞正偶像日本樂隊安全地帶同在灣仔開騷，他笑說：「你買飛嚟睇我真係有taste，不過我都想盡快完騷，拉大隊去睇玉置浩二。」其後他更任由歌迷出題，並以一句「睇安全地帶」來即席作曲、填詞，騷盡「quali」。

狂踩莊冬昕騎呢

Anthony憶述八十年代在夜總會賣唱的辛酸史時，趁機寸爆莊冬昕的《食軟雪糕》及林峯的《Chok》等歌曲騎呢，他先問在場歌迷：「我個人好主觀，大家最近有冇啲歌係好『乸』憎聽？我最近聽到啲歌好騎呢！」語畢播出《Chok》，他即「chok峯」上身，托頭、扭腰、電眼等作狀甫士樣樣出齊，更對台下全家總動員撐場的表姨甥阿聰說：「呢啲歌唔關你哋事嘛？係就捉你上台打靶。」

放大圖片	身穿短裙的謝安琪由倫永亮拖上台，張繼聰則緊隨在後，造就張謝兩人難得的合唱。	張繼聰夫婦帶同囝囝張瞻見「表舅公」。

被讚靚仔好受落

雖然全晚有名歌迷不斷無厘頭大叫，但當被讚靚仔時，Anthony受落說：「我照鏡時都覺得似郭富城，不過有時係盧海鵬feel。其實大家都畀我呃晒，我喺後台未化妝前成隻老妖咁。」個唱接近尾聲時，阿聰及淡妝上陣的Kay被邀上台，Kay指是兩夫妻婚後首次同台合唱：「今日真係好歷史性，除咗新人嗰年之後都冇同台過。」阿聰更爆Kay恨唱《此情只待成追憶》，最後三人在一片掌聲中合唱此曲。

文：音樂組