紅姑追睇馬明床戰心思思拍劇
息影多年的鍾楚紅若真要復出的話，原來希望演出一些有挑戰性的角色，昨日她出席活動時就坦言其實亦有人給劇本她看，可是都是演些重複的角色，她卻想要有挑戰性的；而從未拍過電視劇的她對拍劇也有興趣。
紅姑鍾楚紅昨日以壓軸嘉賓身份出席Longines海港城旗艦店重新開幕活動，穿上黑色貼身連身裙的她優雅迷人，而吳卓羲和馬國明（馬明）則以型仔機師look示人。紅姑表示最近亦有收看兩人主演的劇集《衝上雲霄II》，她說：「好多型男美女，自己平時冇追劇，但呢套最近咁熱，難得TVB製作咁摩登。（會否想拍劇？）唔知我捱唔捱到，佢哋冇得瞓，我從來都未拍過劇。（有冇戲癮？）唔知，應該幾好玩，劇集有連貫性。（試吓拍？）冇人問過我，要睇情況同題材。（咁復出拍戲？）都有人畀劇本我睇，不過都係角色重複，我想要有挑戰性嘅。」
另外，提到有傳王祖賢復出及早前返港一事，紅姑表示也有看過報道，雖然對方被指走樣且面容變得硬膠，她依然力撐對方至今仍然靚女。而有份出席霍啟剛和郭晶晶婚宴的紅姑得悉晶剛B誕生後即開心地恭喜他們，並表示會親自致電祝賀。
吳卓羲夢中情人
馬明與吳卓羲首次與紅姑見面，均大讚紅姑靚女，亦是他們的夢中情人。馬明說：「可見當年港姐質素有幾好，紅姑當年排第四都咁靚，競爭好大，但依家都大。」對於前晚播出他與江美儀在《衝上雲霄II》中的一場激烈床戲，他說：「我有睇，唔係好激啫，我同美儀嗰條線幾得意幾搞笑。（你好猴擒，又問『我得唔得？』）我跟對白講o架咋，嗰場戲係想交代我個角色阿Roy比鄧梓峰個角色熱情同年輕。（有網民接受唔到咁重口味？）有啲人接受唔到姊弟戀，之後仲會有呢啲戲份，但呢場係最激嘅。」
江美儀帶狗掃貨
而江美儀前日下午驅車前往星街掃貨，抱着愛犬的她心急把車停於雙黃線後便步往附近店舖，並取了大堆新裝往試身室，約十分鐘已滿載而歸，見記者拍照時她更拿起狗仔的手向鏡頭揮手，其後男店員代她拿戰利品上車。
文：名人組