倫永亮速減八磅 變縮水雞泡魚
音樂人倫永亮昨日出席演唱會綵排，透露日前翻看三月與葉德嫻演出片段時，被自己的包臉嚇暈，更抵死得以「大過雞泡魚」來形容，令他激起收身團火，近日積極做運動及節食減磅，挑戰張家輝，更於個半月成功踢走八磅。
倫永亮（Anthony）將於本月三十一及九月一日假灣仔伊利沙伯體育館舉行兩場《倫永亮ONE VOICE TEN FINGERS演唱會》，他昨日一身便服出席綵排，即場發揮創作本色，自彈自唱「口水歌」，引得全場捧腹大笑，連他自己都笑不攏嘴。
林憶蓮自薦幫手
瘦了成個碼的Anthony承認成功踢走八磅，他說：「睇番之前同葉德嫻演出，塊面大過雞泡魚，做歌手要有形象，個半月前已經開始做運動，由142磅減到134磅。（練人魚線？）當初目標係練到張家輝咁，不過遙不可及。（有咩嘉賓？）林憶蓮、葉德嫻、葉麗儀、陳潔靈同呂方知道我開騷，已經主動問有咩幫手，唔想令佢哋有壓力，到時捉佢哋上嚟仲有驚喜。」
冇做《星夢》評審
Anthony透露無綫得悉他忙於個唱綵排，故未有再邀他擔任歌唱比賽節目《星夢傳奇》評審，他說：「我睇好鄭俊弘。（傳無綫要佢拍劇唔畀佢唱歌？）無綫有佢嘅安排，無綫都出好多紅星。」隨即笑言有意接拍無綫劇集，Anthony說：「一定要做男主角，仲要演英俊美少年。」
文：音樂組