傅嘉莉攻演藝圈鋪路做杏兒
模特兒傅嘉莉最近進攻電視圈，有份拍攝人氣劇集《衝上雲霄II》，原來她一直對演戲有興趣，當模特兒時已跟老師學戲為演藝事業鋪路，至今終於如願衝上雲霄，更視胡杏兒為目標！
我2006年入行做模特兒，當年同朋友去日本玩，同行嘅朋友其中一個係模特兒，喺當地巧遇香港模特兒公司嘅人，於是就一齊食飯，席間佢哋問我有冇興趣做模特兒，我就係咁入咗行。我好好運，第一年已經接咗好多大型廣告，好似護膚品牌同飲品廣告，首年加入公司，我已經成為全公司收入最高嘅模特兒，收入超過七位數字，我真係好多謝公司畀咁多機會我。
有苦自己知
唔少人以為做模特兒好容易，只係行行企企就有錢收，但入咗行就發現唔係咁簡單。所有嘢都要自己處理，冬天着夏天衫，夏天着冬天衫。有一次喺韓國拍樓盤廣告，開幾個鐘頭車去邊界地方拍攝，仲係半山一個公園，當時氣溫只有2度，我要着住條雪紡裙，冇着絲襪，坐喺架旋轉木馬上面，但架木馬並唔係木造，而係鐵做，我雙腳騎上木馬嘅時候已經無晒感覺，雙手同雙腳變成紫色，返到酒店沖熱水涼發覺好多地方起紅斑，原來已經凍傷咗。
另外有一次喺內地郊外拍攝羽絨廣告，當時係夏天，36度高溫，我途中中暑暈低咗，醒咗又要繼續拍，仲有經常要喺條街度換衫，因為模特兒時薪高，幾個鐘頭嘅工作，可能等於人哋幾個月嘅人工，所以客戶都會對我哋有好多要求，總之呢類經驗真係多到講唔晒。
掌握主導權
做模特兒最大嘅得着係學識獨立，好快搵到好多錢，我23歲已經買第一層樓。做呢行見咁多靚嘢真係好大誘惑，但家人自小教我唔好先使未來錢，要學儲錢，我平時都好慳，嫲嫲成日都同我講一句說話，就係做人要靠自己，唔好靠人，如果靠人即係將主導權放喺人哋嘅手上，只有靠自己最穩陣，唔會因為其他人而失去任何嘢。
未做模特兒之前，我已經拍過戲，2003年有份拍《無間道2》，當時我阿姨負責帶模特兒試鏡，我做助手玩吓，點知揀中我，嗰時我仲讀緊書。我一直有跟老師學演戲、唱歌，又學日文、國語，希望對日後嘅演藝事業有幫助。所以今次有幸參演劇集《衝上雲霄II》，真係覺得自己中咗頭獎，終於可以將我咁多年學嘅理論實踐到，當然我經驗咁少，一定唔係做得好，至少可以畀我知道能力去到邊，邊方面做得唔好，可以改善。
驚恐症先兆
相比做模特兒，做演員嘅壓力更大，拍完劇會擔心收視，怕觀眾唔接受自己，最近有關我同吳卓羲嘅緋聞，我覺得好多嘢想解釋都解釋唔到，唔解釋又怕大家誤會，解釋又怕愈描愈黑，話做藝人冇私人空間，我開始慢慢感受到。因為壓力太大，我成日都會忽然喊，會覺得透唔到氣，睇醫生話我有少少驚恐症嘅先兆，如果情況再持續就要食藥，當然我明白食得鹹魚抵得渴。
今次拍劇，胡杏兒幫咗我好多，其中喺三亞我同佢有場內心戲，初時我好擔心，拍嘅時候杏兒帶到我入戲，我好輕易咁喊出嚟，拍戲嘅對手真係好重要，有時唔明都會請教佢，當然仲有（吳）鎮宇哥，佢好有經驗，畀好多意見我，我哋拍每場戲前會圍讀劇本，佢會教我點演繹句對白會順啲，有時又會睇我拍嘢，雖然有壓力，但佢在場睇住我個心會定啲。至於卓羲每次同佢拍對手戲，佢都會畀意見我，有時佢話我做得唔錯，會畀到我一個肯定，令我更有信心。
而我視杏兒為努力嘅目標，佢可以為拍劇又肥又瘦，覺得佢嘅可塑性好大，演技愈嚟愈成熟，由第一輯《衝上雲霄》到第二集已經好有改變，我希望我都可以做到佢咁。啲人問我幾時結婚，我話當有一日我見到自己事業上有我嘅代表作同獎項，對自己有所交代，就可以去結婚生仔。
文：名人組
攝：劉智源
髮型：Ray Mork＠Chin G.
服裝：Joyce
場地：Billion Club