陳偉成一屋兩「妻」 拖Yumi示威
陳偉成（Avis）與舊愛周秀娜甩拖後，感情生活亂七八糟，為撇清與「柑桔」蕊蕊有一腿，Avis自爆新歡另有其人，而這位新歡昨日終於曝光，正是四年前出過寫真的o靚模尹蓁晞（Yumi），Avis昨晚還拖實Yumi睇波，高調晒恩愛。最頂癮是Yumi原來是蕊蕊同居好姊妹，令這段關係亂上加亂。
自蕊蕊日前踢爆曾與Avis拍拖，怒斥對方花心後，Avis為免變成極品賤男，除堅稱沒有跟蕊蕊拍拖外，前日在社交網站自爆正蜜運中，可是他死也不把女友真正身份曝光。但原來溝女有一手的Avis，鎅掂的新女正是早前轉戰台灣發展的o靚模尹蓁晞。當以為關係明朗化之際，卻驚爆Yumi不但與蕊蕊是好姊妹，二人還與組合MVG成員兼好友周曉彤（Ivy）同居。
關係亂七八糟
早前蕊蕊已在微博自爆與Ivy是同居室友，原來Ivy一起住並不只得蕊蕊一人，Yumi竟是同居三人組其中一個。再加上蕊蕊被指與金剛過從甚密，令這段四角關係更加混亂。其實Yumi在微博早已透露與Avis拍拖端倪，只見她大前日在微博寫道：「感情沒有誰對誰錯，你被人說是蟑螂我真的很不開心！」為Avis講好說話。
為證誰是正印，Avis昨晚高調拖實Yumi睇籃球賽示威，只見二人毫無避忌，十指緊扣，煙韌到暈！問是否拖新女示威？Avis說：「唔係示威，只係唔想件事愈發愈大，同Yumi商量過，所以先公開！」他強調Yumi並非第三者，並自爆相識經過：「其實幾年前已識，咁大家之前冇拖拍，我又開新公司要搵佢做model，見多咗就一齊，依家啱啱拍咗一個月拖！」問是否與蕊蕊和Ivy同居？Yumi說：「係同佢哋一齊住，不過同蕊蕊唔熟！」
娜姐恭喜舊愛
對於Avis被蕊蕊直斥花心男，Yumi即深情望實愛郎，攬攬Avis說：「我信佢！」問會否避免跟蕊蕊面左左而搬屋？Avis即大丈夫上身為女友代答：「未至於要搬，唔想因為呢件事令佢哋冇朋友做！」他強調見到蕊蕊不會感到尷尬，並拍心口表示不怕有自己與蕊蕊的慾照流出！
面對舊愛晒新歡，周秀娜一於冇眼睇，表示不作回應，只透過經人Roy說：「恭喜佢（Avis）囉！可以重新生活！」而蕊蕊至截稿前仍未回覆本報。
文：專案組