朱晨麗沙上舞 晒料冇難度

朱晨麗去年處女下海拍攝劇集《名媛望族》，由於口音未正兼演技幼嫩，結果被網友一致劣評。最近她在新劇《衝上雲霄II》飾演有錢女進步不少，對白亦明顯下過苦功，曾是專業芭蕾舞團團員的她，今次亦能於劇中展現舞姿，並特別花時間編了一段一分鐘多的現代芭蕾舞，怎料劇組選址於沙灘拍攝，縱使她沒在沙上跳芭蕾的經驗，為免花時間改動動作，阿朱惟有頂硬上，結果拍攝中途發生不少有趣事，她謂：「以前多數喺舞台跳，今次第一次喺沙灘跳，有個動作係一隻腳做重心，另一隻腳慢慢向上變成一字馬，結果隻重心腳就慢慢插入啲沙度，好搞笑。雖然最後唔知會剪幾多，但當初聽到有呢個機會發揮自己所長都幾開心。」

獲讚開心整天

談到當日拍攝感覺，阿朱直言感覺自由：「原來跳舞唔只係on stage先做到，室外會更加放開，望住個海跳舞，你會覺得成個地方都係你嘅，當日拍得好順利，冇畀人影響，工作人員不斷讚我好靚，雖然唔知真定假，但都開心咗成日。」

朱晨麗	朱晨麗曾是專業芭蕾舞團團員，身形與舞藝一流。

未能勝任空姐

在新劇中一嘗當空姐滋味的她，不諱言體驗過後，已斷定自己未能勝任該職位，她謂：「有一幕做錯嘢畀人罰洗廁所，要抹嘔吐物，本身都未試過抹，道具人員又做得好真，整到成陣酸味出嚟，真係頂唔順，所以做空姐真係好難。」阿朱亦大讚劇中飾演其父親的單立文是才子，除了彈結他了得，就連講笑也很厲害，寄望再次合作。

採訪：影視組　

攝影：謝國華

髮型：Philip Lee

服裝：Twenty Sixty Eight

場地：Dream Cafe