Super Girls血拼東京 一篋去兩篋返
女子組合Super Girls成員Aka及Heidi早前到東京旅行，兩女為爭取時間血拼，每朝八時起床行足十三粒鐘，更專程到和服店一嘗穿和服滋味，雖然價錢太貴空手而回，但Heidi依然一篋去兩篋返，難怪她說：「終極爆血！」
Super Grils隊長Aka早前趁有幾日假期，與好姊妹Heidi到東京濕平。Aka坦言此行最開心到和服店，她說：「我同Heidi都想買套和服，不過因為太貴所以冇買，但我哋試得好開心。」Aka承認試完唔買有點尷尬：「不過售貨員好好，仲認得出我哋係香港藝人。」
獲型男帶路
Aka自爆曾在街上被型男搭訕：「佢見我同Heidi喺條街周圍望，主動行埋嚟問我哋係咪搵路，仲好好帶我哋去添。（嗒糖？）靚仔囉。」問到血拼成績？Aka說：「我就好慳，Heidi就買咗好多。（忍到手？）忍到呀，我專登換好少錢過去。」
Heidi承認到了日本不能自拔，瘋狂掃貨，更一篋去兩篋返。她說：「真係忍唔到手，衫褲鞋襪都有買，見到咁靚怕唔買會後悔，今次真係終極爆血。」對於獲當地型男主動帶路，Heidi說：「係呀，佢見我哋不停行嚟行去，主動帶我哋去目的地，真係好好人。」
文：音樂組