傅嘉莉轉軚冧Sam哥

跟不少觀眾一樣，模特兒傅嘉莉十年前已對劇集《衝上雲霄》情有獨鍾，想不到事隔多年，Kelly首次拍攝的長劇便是《衝上雲霄II》，與影帝吳鎮宇、視后胡杏兒及靚仔張智霖（Chilam）合作，難怪她直言感覺如中獎：「我飾演餐廳沖咖啡員，同大部分演員都有對手戲，而且角色有遺傳病，好有發揮機會。」

鎮宇教做戲

拍攝現場有一大班靚仔飛機師，嗒晒糖的Kelly笑言一直很欣賞這份職業：「知道好難考，要學歷高，體能又嚴格，而且男士着起制服更加man！」對於鎮宇、Chilam及緋聞男友吳卓羲的機師Look，她竟唔揀卓羲，狂讚「Sam哥」鎮宇型到震：「個個都型，但十年前已經好冧『Sam哥』，現場都唔覺意流露對佢嘅傾慕！鎮宇真人好Nice，好肯教後輩，不停啟發我點去演戲，有次對戲我好大壓力，佢拎走我份劇本，叫我唔好死背，應該用角色嘅語言去講，效果真係好好！（佢好惡？）佢冇鬧過我，有時佢都係想拍攝進度快啲。」

傅嘉莉於劇中與緋聞男友吳卓羲合作，卻自言心繫Sam哥。

傅嘉莉獲Sam哥教路，狂讚對方親切。

投放真感情

Kelly與卓羲劇中有感情線，因而傳出緋聞，她直言當時非常投入角色，難免有真感情：「之前我哋唔認識，所以要了解吓，要搵到愛佢角色嘅原因。（之後抽離到？）抽到，戲中都只係暗戀，其實我係對佢嘅角色了解多啲，反而真人認識冇幾耐。（之後見面會尷尬？）大家都係專業演員，明白係咩事。」

文：影視組

場地：紅磡都會海逸酒店

服裝：Chloe

髮型：Chris Cheng＠il colpo platinum